Wan jngoh u SDG ki BSF ban pynkhlaiñ ki jingpahara bad shongshngaiñ ha khappud ka ri

Shillong, Risaw 16: U Mahesh Kumar Aggarwal, Special Director General (SDG) jong ki shipai Border Security Force (BSF) ka Eastern Command, Kolkata, u la wan ban jurip ïa ka jylla kumba 4 sngi ha ka BSF Meghalaya Frontier ban bishar ïa ki kam jingpynkhreh ha ki kam khynra bad ki jingpynwandur ki jingtei ha shilynter jong ka khappud ka ri India-Bangladesh (International Border).
Kane ka jingwan jngoh kaba 4 sngi, kaba la sdang naduh ka 13 tarik haduh ka 16 tarik mynta u bnai, ka long kum ka jingthmu ban pynkhlaiñ ïa ki rukom pynïaid kam ha ka thaiñ khappud bad ban pynthikna ïa ki jingshong shngaiñ jong ka ri baroh kawei.
Ha ka sngi ba u la wanpoi, ïa u SDG la pdiang burom da ka Guard of Honour bad ka jingpdiang sngewbha da u IG BSF Meghalaya OP Upadhyay, ha ryngkatlang bad ki heh ophisar ka frontier.
Na ka liang u IG u la kren bad batai lyngkot halor ki kam ïaid pahara, ki rukom treikam kiba ki shipai ki la shim ban ai ki jingshngaiñ ha shilynter u pud u sam ka ri, ba kynthup ïa ki jingeh ba mad da ki shipai ha kine ki thaiñ kiba long lum, nangta ki kam khaïi beaiñ ha khappud, ki jingpyrshang ban rung beaiñ, bad ki jingmih na ki jingma ki kam pyntriem ha ki bynta jong ka khappud.
U IG u la batai ruh halor ki kam ïakhun pyrshah ïa ki kam pyntriem ba la shim da ki shipai BSF ban pynkhlaiñ ïa ki jinglah ban pynïaid kiba skhem ha ki thaiñ khappud, ban kyntiew bad ban pynbun ïa ki tiar kiba peitngor (technological surveillance system), bad ban pynkhlaiñ ïa ki jingïaid pahara jong ki shipai ha shi lynter jong u pud u sam.
Ha kine ki sngi jong ka jingwan jngoh ïa ka jylla, u SDG u la leit ban khmih ïa kiba bun ki Border Outpost (BOP), u la sangeh ban ïakren wat mynmiet ruh bad ki shipai, u la ïasyllok lang bad ki field commander bad ki shipai kiba la buh pahara ha ki thaiñ ba hakhmat jong ka khappud.
U la pynlong ruh ïa ka Prahari Sammelan, bad ïaroh ïa ka jinglong ba la khreh bad ka jinglong tbit jong ki shipai BSF, bad banjur halor ka jingdonkam ban long kiba peitngor, ban ïatreilang, bad ban long barabor kiba la khreh ban ïakhun ban pynthikna ïa ka jinglah ban bat skhem ïa la u jong u pud u sam.
Kham hadien u SDG u la leit ban ïakynduh ïa u Myntri Rangbah ka jylla u Conrad K. Sangma, bad ïa u Chief Secretary Dr. Shakil P. Ahammed, ban pynlong ruh ïa ka jingïasyllok halor ki kam ïatreilang kiba long kongsan ha ka jingshongsuk shongsngaiñ, ki jingdonkam ban ïasam ïa ki lad syntiat ne jingtip, bad ki jingïatreilang hapdeng ki agency ban pynthikna ki lad jingïada kiba skhem ha ki thaiñ khappud.
U SDG u la leit ruh ban jngoh ïa ka Frontier Headquarters campus, u la shim ki jingbishar kam halor ki kam jingtei, nangta u la bthah ïa ka jingdonkam ba ïai bteng ban pynneh ïa ka khappud kaba lait na ki kam runar, kaba long kaba la khreh bad ka jingpahara kaba khlaiñ ha u pud u sam ka ri India bad Bangladesh.