L a hap ban ai jingïaroh ïa ka jingtrei shitom jong ki Pulit ka them Ribhoi kiba pyndep hok ïa la ka jong ka kamram ban talasi naphang ïa ki kali kiba ïaid ha shilynter ka surokbah National Highway-6 ha Ribhoi District. Hynrei wat hapdeng ka jingpeitngor ki Pulit hynrei ki dang don byllai ki nongñiah kali kiba leh bym suidniew ïa ka aiñ Motor Vehicle Act. Ka jingleh bym suidniew jong ki katto katne ki nongñiah kali ïa ka aiñ ñiah kali ka buh jingma ïa kiwei pat ki nongñiah kali kiba bud ïa ki kyndon aiñ ñiah kali.
Lehse u SSP ka Ribhoi, VS Rathore un dei u ophisar Pulit uba nyngkong eh ha ka Jylla ban mih hi da lade manla ka sngi mynta la katto katne sngi ban khynra naphang bad ban talasi ïa ki kali namarba ka jingpynkheiñ aiñ ki nongñiah kali ha shilynter ka surokbah NH-6 ka long shaba palat pud.
Ki jingjia aksiden kali ha surokbah National Highway-6 la ju sakhi na ka por sha ka por bad bun tylli ki mynsiem briew ki la shu duh ei tang namar ka jingñiah kali khlemakor jong ki katto katne ki nongñiah kali ki bym kheiñkor ïa ka jingim jong ki parabriew.
Watla ki jingjia aksident ha ka jylla Meghalaya ki kham duna lada ïanujor bad kiwei kiwei ki jylla ha ka ri, hynrei ka donkam pat ïa ka tnat Pulit ban talasi manla ka sngi ïa ki nongpynkhein aiñ kiba buh jingma ïa ka jingim jong ki nongleit nongwan ha surokbah.
Watla ka tnat Pulit ha Ribhoi ka la pynlong ïa ka jingtalasi kali mynta la kham katto katne por bad kynthup ruh ha ki sngi u Blei hynrei la ïoh ba ki nongñiah kali kim patiaw satia namarba ki dang don bun kiba pynkhein ïa ki aiñ ñiah kali la ka long khamtam eh ïa kiba dih kiad ha ka por ñiah kali.
Naduh ba la jyllei ki nongñiah thuk thuk ar shaka ka rukom ñiah ka long kaba i shyrkhei bha ha surok. Khamtam leilei ki khynnah samla kiba ñiah ïa ki thuk thuk ar shaka i kumba ki ñiah khyllew ha surok ban ïoh pyni ba ki dei tang ma ki, kiba kham tbit ka ñiah thuk thuk, hynrei kim pyrkhat pat ïa ka jingim lajong bad ïa ka jingim jong kiwei pat kaba lah ban buh jingma lada jia kano kano ka jingjia aksiden kaba lam sha ka jingmynsaw bad wat haduh u pud ka jingduhei ki mynsiem briew.
Kiba bun ki nongïaid lynti bad ki nongñiah thuk thuk ar shaka kiba ïaid phikir ha surok kiba kylla sohpdung ei khamakha khlem poi pyrkhat namarba kiwei pat ki nongñiah thuk thuk ar sha ki ñiah katba ki sngewbit ïalade bad kim pyrkhat shuh ïa ka jingim jong kiwei pat la ki mynsaw ne wat duhei ka jingim.
Ym tang ha Ribhoi District hynrei ka tnat Pulit ha kylleng ki district ka ladei ban kham trei shitom ban kham pyrkhing ïa ka rukom ñiah kali jong ki paidbah namar katba ki snem ki nang tyllun ka jingthied kali saw shaka bad thuk thuk ar shaka ki paidbah ka long manla ka sngi la ka long ha sor, ha khapsor ne wat ha ki shnong nongkyndong namarba ki pyrkhat ïa ka jingïabeh por ban pynsuk ruh ha ka leit ka wan.
Ka jingpyrkhing jong ki Pulit ïa ki nongpynkhein aiñ kam dei ban long tang ïa ki riewpaidbah hynrei ki dei ban pyntreikam salonsar ïa ka aiñ. Kumba la sakhi ba ki don ki kali sorkar ML-01 kiba pynpah siren haba don ka jingdheng kali. Kane ka pynshrai haduh katta katta ïa ki paidbah. Nalor kata, ki Pulit kim dei ban khaprib ïa ki khmat haba ki ïohi ïa ki kali remdor kiba tah iitiong katba ki peit khmat pynheh pat ïa ki kali ki riewpaidbah kiba tah iitiong.
Dang shen, ngi la sakhi ruh ïa ka jingpyntreikam ryntih ïa ka aiñ da ka tnat Pulit Ribhoi da kaba weng ïa ka siren na ka kali jong ka iingbishar Meghalaya High Court. U Senior Superintendent of Police ka Ribhoi District u VS Rathore u ong ba ka aiñ ka treikam lang kumjuh ïa baroh. Hakhmat ka aiñ ym don uba heh kyrdan ne uba rit kyrdan. Ki Pulit na kiwei kiwei ki district ruh ki dei ban bud ïa kane ka nuksa jong u Senior Superintendent of Police ka Ribhoi District ban pyntreikam salonsar ïa ka aiñ khlem da leh shiliang khmat namarba ka jingleh shiliang khmat ka wanrah ïa ka jingjah burom hi ïa ka tnat Pulit lada ki paidbah kin kynnoh bad kin kynthoh laiphew jait.
