Nongpoh, Naitung 01: Kum ka jingpynkhlaiñ ïa ka party na ka bynta ka election MLA jong u snem 2023 hapoh ka jylla bad hadien ruh ba la dep ruh ban pynbna ïa u kyrtong ba pura na ka Mawhati Constituency, ïa u Dr. Evarist Myrsing, ka party BJP ka la pynskhem ruh ïa u nongïalam ba rangbah ha katei ka Constituency da kaba ka la thung ïa u Bah Shanborlang Rympei kum u President ka BJP Mawhati Mandal ba un ïalam ïa ka party bad ruh ban dang pynkhlaiñ ïa ka party na ka bynta ka jingjop u kyrtong ba la pynbna da ka party BJP ha Mawhati Constiteuncy.
Kum ban pynkynmaw, ka Party BJP dang shen ka la pynlong ïa ka jingïalang ha ka Shnong Tyrso ba la wan shim bynta naduh u Bah Earnest Mawrie kum u State President bad u Bah Sanbor Shulai, myntri sorkar na ka Party BJP ki la pynbna paidbah ïa u Dr. Evarist Myrsing kum u kyrtong ka BJP na Mawhati Constituency bad dei hadien ba la pynban ïa u kyrtong ka party BJP ka la thung mynta sa ïa u President ka Mawhati Mandal na ka bynta ban dang pynkhlaiñ ïa ka party.
Kumba la paw ha kine ki sngi, u Dr. Evarist Myrsing kum u kyrtong ka BJP na Mawhati Constituency wat la kiba bun ki ïa kren pyrshah ïa ka party BJP, hynrei halor ki nongrim utei u samla kiba bun ki riew rangbah bad ki paidbah ki la wan ban ai ka jingkyrshan bad kane ka jingwan kyrshan ki riew rangbah bad ki paidbah ka la ai mynsie ïa une u samla ba un dang trei shitom na ka bynta ka jingjop na Mawhati Constituency.
Ïa Bah Shaborlang Rympei la thung ïa u kum u President ka BJP Mawhati Mandal ha ka 29 tarik u Jylliew 2022 da u President ka State BJP, u Bah Earnest Mawrie bad la pynkup bor ruh ïa u ban un shim ïa ka lyngkor katkum ki riti treikam ka party BJP.
Na ka liang u Bah Shanborlang Rympei kum u President ka BJP Mawhati Mandal, u la pynpaw ka jingkmen ba ka party ka la ibit ïa u ban shim ïa kane ka lyngkor nongïalam hapoh katei ka Constiteuncy bad kum u President ka BJP hapoh katei ka Constituency u pan ka jingkyrshan na ki para nongïalam bad ki nongkyrshan ka BJP ba kin ai ka jingïatrei lang bad ka thong hi ka long ban pynjop don burom u kyrtong ka BJP na ka bynta ki jingkylla hapoh ka Mawhati Constituency kaba dei kawei na ka Constituency kaba dang shadien hapoh ka jylla.
