Nongstoiñ, Risaw 13: Ki nongkhaïi mar rep na Rimuliang ha ryngkat ka HYC Rimuliang circle, ha ka sngi nyngkong jong ka taiew ki la leit ban pynkynmaw biang sha ka Hima Jyrngam Sirdarship, ban kyrpad na ka hima ba kin pynkynmaw biang ïa ki nongïalam shnong ba kin nym ai lad ïa ki bar jylla ban wan khaïi bad rung thliew ïing briew, ban wan lum ïa ki mar ki mata ha ki dong ki shnong khlem ki kot ki sla kiba biang,
Ha ryngkat ka jingthoh ki nongïalam jong ki ar seng, ki la leit ban ïakynduh ha ophis Hima ban pynpaw naduh ki nongkhaïi haduh ki nongbylla. Na ka liang kine ki nongïalam ki la ïoh ban ïa tai ïa khir bad ki bor hima, ha kaba na ka liang jong ka hima ka la pdiang ïa ka shithi bad ai ïa ka jingmynjur ban khang lad ïa ki nongkhaïi kiba nabar jong ka jylla.
Na ka liang ki nongkhaïi bad ka seng HYC ki pynsngew ruh ïa ka jingjur jong ka jingshah tuh shah rong ïa ki motor bike, ki tiar ki tar kiba kordor dang ha kine ki sngi khlem da lap dien shuh shano ki rong. Kane ka la nang pyntharai sniew ïa ki nongïalam ki ar kynhun, ïoh dei kitei ki bar jylla kiba ju rung ju mih man ka por.
U Bah B.K bani uwei na ki nongïalam jong ki ar kynhun ba leit ïakynduh ïa ki bor hima, u da kyrpad jur ruh ïa ki paitbah ba kin ai ka jingïatreilang, khamtam na ki bor shnong ban ïa teh lakam halor kane ka kam, khnang ba kan ym buh jingeh ïa ka khaïi pateng jong ki trai shnong.
