Shillong, Risaw 13: U MLA ka BJP na Pynthorumkhrah bad u Myntri barim ka sorkar u Bah AL Hek u la pynpaw ïa ka jingbym mynjur bad ka jingdawa ka state BJP ba dei ban wengnoh mardor ïa ka Deputy Commissioner ka East Khasi Hills halor ka jingkynnoh ba ka la pulom ban wanrah ki lad jingïada ïa ki khynnah.
Haba kren sha ki lad pathai khubor, u Bah Hek u la ong ba u la kren ïa u state BJP president ban pan jingpynshai halor kane ka rai, da kaba kylli halor ka jingïadei bad ka kam jong ka tnat pulit.
“Katkum ka jingsngewthuh jong nga, ki kam runar ki hap beit hapoh ka jingpeit jong ka tnat pulit. Nga sngew ba kam don jingmut ban dawa wengnoh mardor ïa ka Deputy Commissioner,” u la ong.
U Bah Hek, uba dang don mynta ha Nongbah Delhi, u la ong ba u dang hap ban sngewthuh pura ïa kane ka kam kaba iadei bad ka jingdawa bad pynpaw ruh ka jingsngewphylla ba ka party ka khlem pyntip ne ïasyllok bad u ha shwa ba kin dawa ïa kane ka kam.
