Lyngba ki jingpynsngewthuh paidbah, la pynkut noh ïa ka Mental Health Week ha Salmanpara

Shillong, Risaw 13 : Ka jingrakhe ïa ka World Mental Health Week 2025 kaba la long ha kine ki sngi ha South West Garo Hills ka la kut noh da ka jingpynlong ïa ki prokram pynsngewthuh paidbah kaba la pynlong ha Salmanpara. Kane ka jingrakhe kaba la buh da ka phang “Access to Services – Mental Health in Catastrophes & Emergencies,” ka thmu ban kyntiew ïa ka jingai jinghikai bad ki lad ai jingshakri lyngba ki jingsumar halor ka koit ka khiah jong ka bor pyrkhat jong ki nongshong shnong ka district.
Ki nongkren ha kane ka program ki kynthup ïa Psychiatric Social Worker Canius N. Sangma, Psychologist Lenibell Dokatchi B Marak, District Mission Coordinator S. Jakrime R. Marak, bad District Nodal Officer Dr. Amit Hajong. Ha kane ka jingrakhe la don ruh ki jingkren bapher bapher, nangta ki prokram kiba hikai shaphang ka koit ka khiah bad ka free health check-up camp.
Kham ha shwa, ki la don ki prokram jingkyntip kum ka quiz, essay writing, bad painting competition ba la pynlong ha Adolescent Health Resource Centre, Chengkompara, ha kaba jan 100 ngut ki samla pule na kylleng ki skul ka Ampati ki la wan ban ïashim bynta. Ki samla bad ki khynnah skul ki la pynpaw ka jingsngewthuh halor ka jingdonkam ka bha ka miat ka koit ka khiah ka bor pyrkhat lyngba ki kam ba ïadei bad ka pule puthi bad kiwei.
Ïa kane ka prokram la pynlong hapoh ka shatri jong ka District Mental Health Program (DMHP) bad ba la ïalam da District Nodal Officer Dr. L.C Matgrik. Kiba bun ki district-level health units and services, ba kynthup ïa ka Adolescent Friendly Health Centre (AFHC) jong ka Ampati Civil Hospital, District Hub for Empowerment of Women (DHEW), bad ka One-Stop Centre (OSC), ki la kyrshan ïa kane ka prokram.