Dawa ka HBDRF ïa ka Sorkar ban ïakren bad ka Assam ban pynkut ïa ki jingïakynad ha Lapangap

Shillong, Risaw, 12: Ka Hynñiewtrep Border Dispute Redressal Forum (HBDRF) ha ka sngi Saitjaiñ ka la ong ba kam pynshlur satia ïa ka jingïaumsnam hadien ba ka la mih ka jingïakynad hapdeng ki Khasi Pnar kiba sah ha Lapangap, West Jaiñtia Hills District bad ki jaidbynriew Karbi kiba sah ha ka shnong Tahpat, West Karbi Anglong District, Assam.
Ha ka 9 tarik mynta u bnai ki nongrep Khasi Pnar na Lapangap ryngkat ka jingsynran lang jong ki Pulit ka West Jaiñtia Hills bad ki Pulit ka Assam katba ki dang ot kba ki la shah siat da ki jri siat sim ha ki Karbi tang mar ïa sdang ot ïa u kba.
Ha kane ka jingïakynad, uwei u rangbah Karbi uba la tip kyrteng kum u Orivel Timung, 45 snem eiei na ka shnong Tapat.
U nongaitktien jong ka Forum u Bah Thomas Passah ha ka jingïakren bad ki lad pathai khubor u la ong, “ngi kren da kaba shai ba ngim kyrshan ïa ka jingïaumsnam, ngim kwah hi ruh ban ïohi ba ka jingïaumsnam kan long ka lynti kaba lam sha ka jingbym ïasngewthuh jingmut.”
“Namarkata, ngim pynshlur ïa kine ki kam runar bad ngi kwah da ka lynti kaba jaijai ban pynbeit ïa ki jingïakynad hapdeng ki arliang mamla,” u la ong.
“Hynrei haba ngi peit pat ïa kane ka jingjia kaba la jia dang hapoh ar sngi kam dei satia ka jingjia ka bym pat ju jia mynno mynno ruh hynrei la bun tylli ki snem, kine ki jingjia ki la jia na ka por sha ka por,” u la bynrap.
Haba ai nuska, u la ong, ‘ka jingshah siat ïap (ki Khasi Pnar) ha ka shnong Mukroh, bad kiwei kiwei ki briew ki shu ei ïa la ka jong ka jingim. Namarkata, ka Sorkar ka dei ban sngewthuh shai ba ka dei ban wad ïa ki lad ki lynti kumno ban ïapynbeit ïa ki jingïakajia kham kloi katba lah.”
U la ong ba ki paidbah kiba sah ha ka shnong Lapangap la jan baroh ki dei tang ki nongrep. “Ha ki 7-8 bnai ba la leit noh, tang na ka daw ka jingïakajia, na ka daw ka jingshah pyndik ha ki jaidbynriew Karbi, kim shym la ïohlad satia ban leit sha ki jaka rep, ban sumar ïa ki mar rep bad wat ban ot ïa u kba,” u la ong bad bynrap, “ka long kaei kaei kaba sngewsih ïa ki nongrep kiba shaniah beit tang ha ka rep ban pyndap pynbiang ïa ka ing ka sem da ka kam rep.”
“Ka daw tynrai kaba mih hangne ka dei hi ka jingpyndik jong ki jaidbynriew Karbi ki bym ailad ïa ki nongrep Khasi Pnar ban ot ïa u kba. Ka long kaei kaei ka jingjia kaba sngewsih. Ka Sorkar ka dei ban mihkhmat ban khanglad ïa kine ki jingjia,” la kyntu u Bah Passah.
“Ka HBDRF ka phah ïa ka jingai jingmut sha ka Sorkar, sngewbha ban pynbiang ïa ki bor pahara khnang ban ailad ïa ki nongrep ba kin leit ot lut ïa u kba. Ngi kwah ïa ka Sorkar ba kan ïakren bad ka Sorkar Assam ba kan pynthikna ba ki nongrep Khasi Pnar kin ïohlad ban leit ot ïa u kba khnang ba kin ym ïap thngan,” la ong u Bah Passah.
U la ong ba kumba la ïohi ba ki don ruh ki nongrep ki bym shym la ïohlad wat ban thung ïa ki mar rep na ka daw ka jingshah pynwit (ha ki jaidbynriew Karbi). “Ngi kyntu ïa ka Sorkar ba ka dei ban siew ïa ka bailuksan. Lada ka Sorkar ka lah ban pynlut pisa ban siew ïa ki nongrwai nabar ri balei kam lah ban ïarap lem ïa ki nongrep kiba la mad ïa ka jingduhnong bad ka jingïap thngan,” la pynpa shuh shuh u Bah Passah.
Shuh shuh u la ong, na ka bynta ban pynneh ïa ka shongsuk shongsaiñ ka Sorkar Meghalaya ka dei ban phah shuh shuh ïa ki bor Pulit bad wat ïa ki Pulit CRPF lada donkam ban ai jingïada ïa ki nongrep Khasi Pnar ha Lapangap khnang ban pynthikna ba kan ym don shuh kano kano ka jingïakynad ne jingïaumsnam.
Da kaba pynkynmaw ïa ka jingïakynduh lang jong ka Interstate Border Peace Committee na West Jaiñtia Hills bad West Karbi Anglong ha ka 6 tarik mynta u bnai, u Bah Passah u la ong, “ka jingïalang ka dei kaba la thmu ban wanrah biang ïa ka shongsuk shongsaiñ ha khappud bad ban ym don shuh kano kano ka jingïakynad hynrei ha ka jingïalang ki jaidbynriew Karbi ki la buh pynban da ki kyndon ïa kiba ym shym la pdiang (da ki Khasi Pnar). Ki paidbah ka Lapangap kim kwah ïa ka jingïaumsnam hynrei ka jingangnud jong ki ka long beit ban ïoh rep ha ka jingsuk na ka bynta ban pyndap ïa ka iing ka sem. Ka long kaba donkam ïa ka Sorkar Meghalaya ban ïakren bad ka Sorkar Assam lane bad ka Karbi Anglong Autonomous Council khnang ban pynthikna ba kam dei shuh ban dang don ka jingïakynad nangne shakhmat.”