Pynkheiñ ka tnat sorkar ïa ka thungkam thungjam ba khlem ïaid katkum ka Roster System: ACHIK

Shillong, Risaw 09: Ka Achik Conscious Holistically Integrated Krima (ACHIK) ka la dawa ïa ka jingpyndam noh kaba mardor ïa ki jingthungkam na ka bynta ka Senior System Administrator bad Assistant System Administrator kaba hapoh ka Directorate of Accounts and Treasuries ha kaba ka la kynnoh ba kane ka dei ka jingpynkheiñ ïa ka bhah kam bhah jam jong ka jylla (Meghalaya Job Reservation Policy).
Ha ka shithi ba la phah sha u Myntri Rangbah ka jylla u Conrad Sangma, ka ACHIK ka la kynnoh ba ki la don ki jingbym ïaid beit kiba la paw ha ka rukom thungkam, kaba la ktah kyrpang ïa ki Garo.
Katkum ka jingbatai ka seng, ka la ong ba kine ki jingthungkam ki la ïaid lait bad pynkheiñ ïa ka bhah thungkam ne ka reservation policy ha kaba khlem pyndonkam ïa ka reservation roster kaba long kaba kongsan, khamtam na ka bynta ki Scheduled Tribe ba kynthup ïa ka jaitbynriew Garo. Ka la ong ba kine ki jingthungkam la leh khlem da la ïoh shwa ïa ka jingmynjur na ka Kynhun Myntri ka Sorkar jylla.
Ka seng ka la kdew ruh ba ki jingthungkam la leh beit beit da ka ophis Director of Accounts and Treasuries khlem da la ïoh ka jingmynjur kaba donkam na ka bor kaba dei ban khmih ïa kane ka bynta kum ka MPSC ne ka SCA, kumba la donkam.
Shuh shuh ka ACHIK ka la ong ba kane ka rukom thungkam ka la pynkheiñ ïa kiba bun ki Office Circular ba la pynmih da ka tnat Personnel and Administrative Reforms (P&AR). Ki circular ki la kdew shai ïa ki rukom treikam ha kaba ïadei bad ka thungkam thungjam bad ban bud pyrkhing ïa ka reservation policy, kaba khlem shym la peit bad khmih satia.
“Ki riew shimet kiba la shah thung la ïoh jingtip ba la jied na kiba nabar khlem da don ka rukom treikam kaba shai, ka jingïakhun ne ïakob. Ki la don ruh kiba bun ki jingsngewkhia la kine baroh ki jingthungkam ki don ne em ïa ki jingtbit kiba kongsan, ïoh ba kane kan pynduh pynban ïa ki lad kiba dei hok ban ïoh da kiwei kiba la don ki jingshemphang jingstad bad ki kyrtong kiba la don ka jingtbit kiba bud ïa ki kam kiba dei ban ïaid katkum ka lynti,” ong u President ka ACHIK u M M Sangma ha ka kyrwoh khubor.
U la ong ba ka jingïai ïaid lait ïa ka reservation policy ha baroh ki jingthungkam ka la pynduh lad ïa ki kyrtong kiba la shemphang kiba dei na ka jaitbynriew Garo kiba dei hok ban ïoh ïa kine ki jingshah thungkam. “Kane ka jingleh ym tang ba ka wanrah ïa ka jingbymhok hynrei ka la pynpharia ïa ka jingshaniah jong ki Garo ha ki bor pynïaid kam jong ka jylla bad ki jingangnud jong ka ban ai ki lad kiba ïaryngkatlang,” u la bynrap.
Ka ACHIK ka la dawa ruh ïa ka jingdonkam ban thaw ïa ka jingtohkit kaba laitluid ne ka high-level independent inquiry committee ban tohkit ïa baroh ki rukom thungkam thungjam, bad ban pynbah khlieh ïa ki ophisar kiba donkti ha kine ki kam kiba la pynlong ïa ki jingbym ïaid beit ïaid ryntih ki jingthungkam thungjam bad ba dei ban sdang noh ban ai ki jingpynshitom katkum ki kyndon.
Ka seng ka la pynpaw ruh ka jingkwah ïa ka jingthungkam kaba thymmai, kaba shit kaba shai kaba bud ïa ka roster system jong ka rukom pynïaid kam da kaba ai ka lad ïa ki kyrtong Garo bad kiwei pat ki kynhun kiba la don hapoh ka jingbhah kam.