Babu Kular Khongjirem
Ka Pynursla Constituency kaba kynthup mynshwa ïa ki ar tylli ki Assembly Constituency, kata, ka Nongshken bad Lyngkyrdem Assembly Constituency ka la thaw sniewbok palat mynta ka kynti. Kine ki ar tylli ki Assembly Constituency mynta ki la kylla noh tang kawei ka Constituency,kata, sha ka kyrteng Pynursla Assembly Constituency naduh ba ka la shah pharia ha ka Delimitation of Constituency jong Election Commision ka ri India ha u snem 2013. Dei naduh katei ka snem, ba ka KHADC ruh ka la pharia lang ïa ka Pynursla Assembly Constituency ha ki ar tylli ki MDC Autonomous District Council Constituency. Kawei ka dei kaba don sharum lam sepngi ka shnong Pynursla ba ki ai kyrteng kum ka Nongshken ADC Constituency bad kaba shaneng pat kum ka Lyngkyrdem-Laitkroh ADC Constituency.
Kumba ka long mynta, ïa ka Pynursla Constituency la mihkhmat da u Bah Duh ne Maduh Prestone Tynsong katba ïa ka Nongshken ADC Constituency pat la mihkhmat da ka Kong Grace Mary Kharpuri. Baroh ar ngut ki dei na ka party NPP kaba la lamkhmat ïa kane ka Sorkar MDA-II ha Meghalaya.
Ka Lyngkyrdem-Laitkroh ADC Constituency pat la mihkhmat da u Bah Shemborlang Rynjah na ka party Prah ne VPP. Une u rangbah u la shah jied ruh kum u CEM ha ka EC jong ka VPP ha KHADC bad u la bat tang kumba shiteng snem tam ne duna. U la iehnoh kum u CEM ka KHADC dang ha u bnai September 2025 halor ka jinglong bym koit bym khiah bha ka met ka phad jong u. Ka jing iehnoh jong u ïa ka kam CEM ka la pynduh mynsiem shikatdei eh ïa kiba bun ki paidbah nongkyrshan jong ka seng ‘riewlum ne Seng Trai ri kiba la khmih lynti ïa u ba u dei tang ma u, u ban pynliem ïa u MLA ka Pynursla ba mynta, uba bat ruh kum u Deputy Chief Minister jong ka Meghalaya mynta.
Ym tang ki nongkyrshan ka Seng Trai Ri hynrei wat ki nongïalam ba radbah jong u Prah ne VPP ruh ki la duh mynsiem ne duh jingkyrmen bha namar kumno un ïaleh pyrshah ïa ka elekshon MLA na Pynursla Constituency ha u snem 2028 khlem ka shuki CEM kat ban pynliem lyndang ïa u briew uba dang don ha ka bor bad ka iktiar kum Deputy Chief Minister jong ka jylla.
Ka shong ha ka rai bad ka jingkheiñ politik (political calculation) jong ka party Prah ne VPP la kan pynïakhun neem ïa utei u CEM barim na Pynursla Constituency ha ka elekshon MLA jong u snem 2028. Lada ka party VPP ka la lah ban pynmih jubab ba un jop watla u la pynhiar kyrdan ïalade na ka shuki CEM, kata, kan pynïakhun beit ïa u. Hynrei, lada ka jubab pat ka long da khongpong (negative impact), ka la dei ban wad briew biang da uwei pat u briew uba biang u ban lah shisha ban pynliem lyndang ïa u MLA ka Pynursla uba long ruh u Deputy CM ka Meghalaya.
Kumba ka long mynta, ka lyer u Prah ne ka party VPP ka don jingkyrmen bha ban jop na Pynursla Constituency namarba ki lah ngiah bad kdang lut ïa ki ktien jali ja-um, ka ktien ba thiang kum ka umngap jong u wat ka um ruh imat kam liat shuh lada theh ha ka kriah ne ka shang. Tangba, lada u Prah ne ka VPP kan wad briew ban pynieng da uwei pat, ka ladei ba kan ai dak (green signal) lypa naduh 2026 terter namar lada shu pynbna hak-dak ne kyrkieh bad kynsan kynsan kum long myn ha kane ka MDC elekshon 2024, kan shem jingeh bha ban pynliem lyndang ïa u Deputy CM uba long ruh uwei na ki heh spah (crorepati) jong kane ka juk mynta.
Sa kawei pat ka jingduhnong jong ka thaiñ Pynursla ka long ba u MLA jong ka, uba bat ruh ïa ka shuki Deputy CM mynta u la kyntait hi war ban long ne shimti ïa ka shuki Chief Minister. Katkum ka jingpynmih khubor jong ka seng HITO, ka la tyrwa ban pynïoh noh ïa ka kam Chief Minister da u para Khasi-Jaiñtia namar kumba 15 snem ei ei mynta la bat sah na ka jait bynriew Garo ïa ka shuki Chief Minister ha ka jylla jong ngi.
Katei ka sengbhalang ka la pynmih ruh ïa ka kyrteng ki lai ngut ki riewrangbah na Khasi-Jaiñtia kiba kynthup ïa ka kyrteng u Maduh Prestone Tynsong bad u Ma Sngiawbha Dhar na ka party NPP bad u Bah Metbah Lyngdoh pat na ka party UDP. Ngi ïohi ruh dang shen ha ki lad pathai khubor (social media) ba haba ki kylli ïa u Bahduh Prestone Tynsong la u don neem ka thong ban shimti ïa ka kam ne shuki Chief Minister kumba tyrwa ka seng HITO, ka jubab kaba shai ba u la ai ka long ba u kyntait bad um treh satia ïa ka shuki namar ka long kumba ïa jied jaitbynriew Khasi-Garo pynban ne ïa long Communal pynban.
Bun ki paidbah ki lyngngoh bad kyndit ïa katei ka jubab jong u. Kumno kumta, lada bat Chief Minister na Garo Hills, kam long Communal hynrei lada jied pat da ki Khasi-Jaiñtia, ka long Communal. Ym tang katta, katei ka jabab u MLA ka Pynursla kaba la pynsngewsih lut bad pynduh mynsiem bad pynduh jingkyrmen lypa ruh ïa ki nongkyrshan ka party NPP na Pynursla Constituency kiba ju khmihlynti bad kanbas ruh manla ka MLA elekshon ba u MLA jong ki na Pynursla un long lypa beit u Chief Minister jong ka Meghalaya.
Mynta, haba u trai met u la kren shai ba um kwah ne um mon ban long Chief Minister, sa kaei pat kin leit pynroh ne leit khring briew na manla ki shnong ka Pynursla Constituency.
Lada ka long ha kata ka rukom, u MLA ka Pynursla ula pynhiar kyrdan hi dalade ïalade khamtam ïa ki paidbah nongkyrshan ka Constituency kiba ju khein ne niew ïa u kum u syiem ne u ‘lei san snem jong ka thaiñ.
Tangba, ngin sa nang ïa peit ïa ki jingkylla jong ka saiñhima-sima ba laiphew jait ha ka Meghalaya jong ngi nangne shakhmat bad ruh katkum ka jingtyllun jong ka por.