Ka jingtuklar ka sorkar ïa ki kam ki ADC, ka long kumba ïuhroit ïa ki hok jong ki, ong ka AITC

Shillong, Risaw 05: Ka All India Trinamool Congress (AITC) ka la pynpaw ka jingsngewkhia halor ka jingpynthikna jong u Myntri Rangbah ka jylla u Conrad K Sangma sha ki paidbah ba ka sorkar kan ym tuklar da lei lei ruh ïa ki kam jong ka khyndew ka shyiap, ki custom, ki bor jong ki longshwa manshwa, kiba dei ki kam kiba kyrpang tang jong ki district council.
“Hynrei shaei u don ha ka 26 tarik u Nailur, 2024, ha kaba u Deputy Commissioner ka West Garo Hills u la pynmih ïa ka hukum ban pynlong ïa ka jingjurip khyndew ha ka thaiñ B-Mahal? Hato kam dei hapoh ka jingtip jong u ne ba la leh ïa kane ka kam hapoh ka jingbthah jong ka sorkar?” ong u nongïalam ka AITC u Bah Fernandez Dkhar ha social media post.
Katkum ka jingong jong u Bah Dkhar, kane ka jingleh ka long kum ka jingïuhroit ïa ki hok katkum ka riti synshar jong ki autonomous district council kaba hapoh ka Sixth Schedule.
U la ong ba da kaba teh bad pynïaid ïa ka kam pisa tyngka bad ban wanrah ki jingpynkylla thymmai bad kumjuh ruh ka jingkyntur sha ki kam khyndew kam shyiap, ka sorkar suki suki ka pyntlot ïa ki District Council, bad pynlong ïa ki ban shaniah ha ka sorkar bad ba kin duh ïa ka bor jong ki.
“Ki ADC ki donkam ki lad jingïada bad ka jingpynkup bor kaba kyrpang, ym dei ka jingpyntwa noh suki suki ïa ka bor pynïaid kam jong ki,” ong u Bah Dkhar.
U la kynnoh ruh kumjuh ba ki jingeh ha Garo Hills Autonomous District Council (GHADC) ka dei ka jingpulom ha ki rukom synshar kaba long naduh ki bor ba halor.
U Bah Dkhar u la ong ba ka sorkar Meghalaya Democratic Alliance da kaba la thmu lypa, ka la leh bym suitñiew ïa ka riti synshar ka ri kaba dei ka kamram hapoh ka Article 275 bad ka la pulom ruh ban pyntreikam ïa ka State Finance Commission Act.
Katkum ka jingong u nongïalam ka AITC, ha ka jaka ban pynïoh ïa ki rukom treikam kiba beit ïa ki autonomous district council, nangta ka jingpynlait ïa ka bhah khajna kaba dei katkum ka aiñ, ki la tyrwa pynban tang ïa ki jinglong jingman kiba ïadei bad ki kam saiñ pyrthei.
U la kdew ruh ba na ka por sha ka por u nongïalam ka Liang Pyrshah u Dr. Mukul Sangma u la ïai kyntu ïa ka sorkar jylla ba kan pynkhlaiñ ïa ka bor jong ka da kaba pynlait ïa ka pisa advance sha ka GHADC na ka bynta ba kan siew ïa ki tulop ki nongtrei, bad kumjuh ruh ban pynbor ïa ka sorkar pdeng ba kan pynsted ïa ka Constitution (125th Amendment) Bill, 2019 ban pynkylla thymmai ïa ka Sixth Schedule.
U nongïalam ka AITC u la ong ba ka jingthung ïa ki IAS officer- ne wat ïa ki Deputy Commissioner kum ki Principal Secretary jong ki District Council ka paw shai ba ka dei ka jingpyrshang ban pynïaid ïa kaei kaba ki ADC ki ïoh ka bor ban synshar dalade ïalade.
“Ïa ki council la thaw ban ai ka jingïada ïa ka jinglong laitluid ki riewlum, ym pat ban pynhiar dor sha kata ka lynti ban khmih bad pynïaid noh da ki tnat ka sorkar jylla. Kum kane ka jingleh ka pyntlot ïa ka jingsynshar ïalade, ka pynhiar dor noh ïa ka bor pynïaid, bad ka jingshet kylla ïa ka mynsiem jong ka riti synshar jong ka ri India,” bynrap u Bah Dkhar.
Katkum ka jingong jong u, ki Khasi, Jaiñtia, bad ki jaitbynriew Garo, ki dei ban pynkhlaiñ ïa la ki jong ki autonomous district council ha ka jaka ba kan pyntlot ne ban pynduna ïa ki bor jinglong laitluid ki ADC.
U la ong ba bun na ki kynhun riewlum ha kylleng ka ri India ki dang ïakhih bad ïakhun ba kin ïoh ïa kane ka jingïada kaba kyrpang jong ka riti synshar ka ri.
“Peit ha Ladakh, ha kaba ki nongshong shnong ki la dawa ïa ka jingdonkam ban kynthup noh ïa ki hapoh ka Sixth Schedule. Kumta ma ngi, kum ki trai ri trai muluk jong ka jylla Meghalaya, ngi dei ban sngew ba ngi long kiba la kyrkhu ban ïoh ïa kane ka jingïada bad ngi dei ban ïada ïa ka da ka jingpeitngor,” pynpaw u Bah Dkhar.