Shillong, Risaw, 03: Ka Sorkar Jylla ka la rai ban pynsangeh shwa ban pdiang ïa ki kyrteng na ka jingpule MBBS hapoh ka bhah Central Pool.
Kane ka rai la wan hadien ka jingpyrshah kaba jur da ka Khasi Students’ Union (KSU) halor ka jingkynnoh ba ka don ka jingleh bym hok ha kaba ïadei bad ka jingjied ïa ki samla pule.
Ïa ka jingpynbna la pynmih da ka Deputy Secretary ka tnat ka Koit ka Khiah ha ka 2 tarik, Risaw, kaba pynbna ïa ka tarik ban pdiang kaba la pynmih ha ka 30 tarik, Nailur 2025 yn pynsangeh shwa tad haduh ban da pynbna da kumwei pat.
Katba, ka jingpynrung na ka bynta kiwei kiwei ki jingpule bad ïa ka MBBS ha Shillong Medical College kan ïaid beit shakhmat kumba ladep ban bthah ïa ki seat pule.
Ha ka jingïakren bad ki lad pathai khubor ha ka sngi Thohdieng, u General Secretary ka KSU u samla Donald V. Thabah u la ong ba ka Directorate of Health Services ka la leh bakla shaba palat ha kaba ïadei bad ka bhah kyrpang, kaba pynduhnong ïa ki samla khasi kiba dei hok ban ïoh ïa ka jingpule.
U la ong ba ki arngut ki samla pule bar jylla, ka Diya Ghosh bad ka Tanushka Chakravarty, ki la shah jied na ka bynta ban ïoh pule MBBS hapoh ka bhah jong ka jylla watla ki dang bun byllai ki samla Khasi kiba kham heh ïa ki marks. Ka Ghosh ka la ïoh 472 marks, katba ka Chakravarty ka la ïoh 442 marks. Hynrei kawei ka samla Khasi ka la ïoh 475 marks, kham heh ban ïa ka Ghosh bad palat hynniew ngut ki samla Khasi ki la kham ïoh heh ïa ki marks ban ïa ka Chakravarty.
Ïa kine ki jingduna la lap ruh wat ha ka thup kyrteng Bachelor of Ayurvedic Medicine & Surgery (BAMS) ha kaba ki samla bar jylla kiba kham rit ki marks ki la shah pynrung ha ka Waiting List ban ïa ki samla pule Khasi kiba kham ïoh ïa ki marks kiba heh.
“Ka Sorkar Jylla ka dei ban pynbeit noh mardor shisyndon ïa kane ka mat. Kam dei ba ngi pyrshah ïano ïano hynrei ka long katkum ka lynti ba la jied ïa ki nongpule,” ong u samla Thabah haba dawa ba dei ban weng noh wat ïa ka Scheduled Caste (SC) Category namarba ym shym la kynthup wat ha ka Reservation Policy jong ka jylla.
Ha ka sngi Palei, u General Secretary ka KSU u la kynnoh ba ka don ka jingleh shiliang khmat ha kaba jied ïa ki samla pule MBBS, da kaba pynpaw ba bun ngut ki samla pule Khasi kiba ïoh ïa ki marks kiba heh ban ïa ki arngut ki samla pule bar jylla ki la shah kyntait.
U la kam ba kawei ka samla pule Khasi kaba kham heh marks bana ïa ka Ghosh bad palat hynñiew ngut ki samla pule Khasi ki kham ïoh heh marks ban ïa ka Chakravarty, ki deihok ban ïoh ïa ka Seat ha ka Unreserved Category.
“Katkum ka thup kyrteng, kiba bun ki samla pule Khasi kiba kham heh ïa ki marks kiba heh ban ïa ki arngut ki samla pule baar jylla ym shym la pynrung ha ka Unreserved Category, watla ki kham leh bha. Kum ban shu kdew, kawei ka samla ple Khasi ka la ïoh kham heh ka marks ban ïa ka Diya Ghosh, katba palat hynñiew ngut kiwei pat ki samla pule Khasi ki la ïoh kham heh ki marks ban ïa ka Tanushka Chakravarty…kaba mut, lada ki samla pule Khasi ki ïoh ïa ka Unreserved Category, sa iwei i samla pule Khais iba don ha ka waiting list i deihok ban ïoh na ka Khasi-Jaiñtia category. Hynrei, ka jingpynrung ka sorkar da ka Tanushka Chakravarty ka paw ba ka dei ka jingynkheiñ ïa ka nongrim, bad pynduh ïa ka hok ki samla pule Khasi kiba dei ban ïoh ïa ka hok pule.”
U nongïalam ka KSU u la buh jingkylli hato kane ka jingbym ïahap ka dei namar ka jingbakla jong ka Sorkar, ka jingbym lah treikam hapoh ka tnad ka Koit ka Khiah ne ka jingthmu ban pynkmen ïa ka iing ka sem jong ka Tanushka, kaba lah ban long namarba ka don ka jingïadei jong ki bad ki heh sorkar kiba don ha ka bor.
“Watla ka long kumno kumno ruh, ka KSU ka shim ïa kane kum ka jingpyrshang kaba paw pyrthei ban pynduhjait ïa ka hok jong ki samla pule Khasi bad kum kine ki jingleh ki lah ban pynmih ïa ka jingkynthoh kaba kham jur na ka seng,” u la maham.
U samla Thabah u la bynrap shuh shuh da kaba ong, “ka KSU ka la dawa na ka Sorkar Jylla ban weng noh mardor ïa ka kyrteng jong ka Tanushka Chakravarty na ka thup kyrteng bad ban ai ïa ki seat ki samla pule Khasi kiba dei hok.”
Lada ka Sorkar kam kohnguh, ka KSU ka la byrngem ban mih sha surok ban pynbor ïa ka Sorkar ba kan ithuh ïa ka hok jong ki samla pule Khasi.
Katkum ka jingong jong u, kane kam dei shuh ka sien kaba nyngkong ba ka KSU kan pynpaw ïa ka jingsngewkhia halor ka jingbhah ïa ki Seat, kum kine ki jingjia, ki la jia teng ha u snem 2020 ha kaba ïadei bad ka seat pule Agriculture.
