Shillong, Risaw, 03: U Managing Director jong ka JETS 24×7 u Bah Pynskhemlang Uriah ha ka sngi Thohdieng u la kyntu ïa ka Regional Transport Authorities (RTA) ban pyllait noh ïa ki Allotment Order khnang ba ki samla wadkam wadjam kin ïoh sdang noh ban sdang ïa ka khih ka kamai da ki thuk thuk ar sha ka katkum ka lynti jong ka aiñ.
“Kane ka mat ka long kaba kongsan bha na ka bynta kito kiba la thep ïa ka aplikeshon ban aplai ïa ka Allotment Order ban ïoh ïa ka Permit ki thuk thuk ar sha ka. Ngi pynpaw ka jingsngewkhia halor kane. Ïa ki kot ki sla ngi la pynbiang lut nadong shadong ïa ki kot ki sla la ki dei ki Affidavit, ki Residential Certificate bad kiwei kiwei. Kat ïa ki kot ki sla ba la aiti ngi la pynbiang bad ngi la bishar bniah bad ngi la phah sha ka ophis u District Transports Officer,” ong u Managing Director ka JETS 24×7.
“Ka jingslem ban pynmih ïa ka Allotment Order ka dei beit hi na ka RTA kaba ka Deputy Commissioner ka dei ka Chairman bad u Secretary u dei u DTO ban khot ïa ka jingïalang ban pyllait ïa ki Allotment Order,” la pyntip u Bah Uriah.
“Ngi sngewkhia bha halor kane, namarba ka la ktah bha na ka bynta kiba aplai ban kamai hok bad ban kamai da ka (lynti jong ka) aiñ bad kiba la wan shakhmat ban aplai ïa ki permit ar sha ka,” la pynpaw u Bah Uriah.
Haba kylli, u la ong, “ngi kyrpad ïa ka RTA ba kam dei shuh ban dang pynslem namarba la 7-8 bnai ki samla ki la shu ap khmihlynti na ka por sha ka por bad ngi la shna ruh da ka WhatsApp Group kaba ngi la buh na ka bynta ki nongaplai. Ma ki ruh ki pynpaw ba ki kwah ban ïoh kamai noh hynrei ba la pynslem haduh katne katne. Ngi kwah ban pynshai ba kaei kaba ngi la leh ka long ba ngi la pynpoi lut ïa ki kot ki sha ka ophis u DTO hynrei ngam tip na ka daw aiu, namarba haduh mynta ki dang bat sah ïa ki kot ki sla. Kane ka la ktah jur bha ïa ki samla wadkam wadjam, kiba kwah ban kamai da ki thuk thuk ar sha ka bad kiba kwah ban aplai da ka Permit ban kamai katkum ka aiñ.”
“Ka dei ka kamram jong ka Sorkar ban ai ai mynsiem bad ban pynshlur ïa ki samla kiba wan shakhmat, kiba pyrshang ban ieng ha la ki kjat ban kamai da ka hok bad da ka lynti jong ka aiñ,” u la ong shuh shuh.
“Nga kyrpad ïa ka Sorkar ba kam dei ban kheiñ sting hynrei ba kan shimkhia ha kaba ïadei bad kane ka jingeh jong ngi ki Aggregator bad ki samla kiba la aplai ïa ka permit ar sha ka,” la kyntu Managing Director ka JETS 24×7.
