Kiew ki jingjia cyber crime ha ka ri da 31.3%, katba ha Meghalaya tang 64 tylli ki jingjia

Shillong, Risaw 03: Ha ka ri baroh kawei, ki jingjia kam runar ne cyber crime ka la kiew mynta da 31.2 per cent naduh u snem 2022 haduh u 2023, ong ka kaiphod kaba dang ïoh shen kaba la pynmih da ka National Crime Records Bureau (NCRB).
Haba ïadei bad kine ki jingjia ki kam runar cyber ka jylla Meghalaya ka mad tang kumba 64 tylli ki jingjia ha u snem 2023. Katba 29 tylli ki jingjia (45.31 per cent) na kine ki don ki jingïadei bad ki kam shah thok shah shukor, 17 tylli (26.56 per cent) ki don jingïadei bad ki kam khaïi met ne die met.
Ha ka ri baroh kawei, ha u snem 2023, kumba 68.9 per cent ki jingjia cyber crime kiba la don ha ka kaiphod ki dei ki kam ba don ka jingthmu bad ki kam shukor, (kaba long 59,526 tylli na ki 86,420 tylli ki jingjia) ba la pynbud sa ka kam khaïi met kaba long kumba 4.9 per cent (kumba 4,199 tylli ki jingjia) bad ki jingjia shah lute kaba long 3.8 per cent (kaba long 3,326 tylli ki jingjia).
La don haduh 1,77,335 tylli ki jingjia kam runar pyrshah ïa ki khynnah kiba la pynrung kyrteng ha kylleng jong ka ri ha u snem 2023, ha kaba kane ka pyni ka jingkiew kaba long 9.2 per cent haba nujor ïa ka snem ba la leit. Nangta kumba 4,48,211 tylli ki jingjia shah thombor ki longkmie kiba la dep ban register, kaba kdew ïa ka jingkiew kaba long 0.7 per cent.
Ha Meghalaya ki la don kumba 628 tylli ki jingjia shah thombor pyrshah ïa ki longkmie kaba long ruh ka jingkiew kaba heh ban ïa kine ki juh ki jingjia ha jylla Manipur kaba don kumba 201 tylli, nangta ka Mizoram da 184 tylli, ka Nagaland da 56 tylli, ka Sikkim 134 tylli, ka jylla Arunachal Pradesh da 326 tylli bad ka Goa kaba la register da 286 tylli ki jingjia hynrei ka kham duna ban ïa ka jylla Tripura kaba don jingjia kumba 791 tylli.
Ka jingjia ki kam runar kaba long da ka jingbun briew kaba la kot lak ka la kiew na ka 422.2 ha u snem 2022 sha ka 448.3 tylli ha u snem 2023.
Ki jingjia ba pynkheiñ ïa ka Motor Vehicle Act ka la long arshah, kaba la kiew na ka 94,450 sha ka 1.92 lak tylli. Ki kam runar kiba ktah ïa ka met ka longbriew manbriew kaba dei na ka kam pynmong sha ka kam shah pynïap ka la kiew da 2.3 per cent, ha kaba la register ruh haduh 11.85 lak kiba ïadei halor kine ki jingjia.
“Ka jingkiew ki kam runar ha ki nombar kiba long katkum ka jingkheiñ na ki pulit ki jylla ki lah ban long na ki jingujor ki lad e-FIR ne ki women helpdesk, bad kiwei kiwei,” ong ka kaiphod. Ka la ong, “Ka jingkiew ne ka jinghiar ha ki nombar ki jingjia kam runar, ha kawei ka liang, ka la khot ïa ka jingtohkit kaba janai kaba dei ruh katkum ki jingjia bad ban pan ruh ki jingïatreilang na ki shnong ki thaw ban lah pynbeit ïa kine ki kam kiba ju ïai jia manla ka por.”