Nongstoiñ, Risaw, 03: Ka shnong Riangdo ka dei ka shnong kaba la paw bha ha ka thaiñ Lyngngam bad ka dei ruh ka jaka pdeng jong ka khaïi pateng, namar ka don ka surok bah kaba pynïasoh shaduh Boko (Assam) ha kaba ha ki snem ba mynshuwa, ha ka por ba ka jingkhaïi dewïong kam pat shah khang ha ka National Green Tribunal, da ki spah tylli ki trok ha ki por tlang ki ïaid lyngba katei ka shnong Riangdo.
Ha katei ka shnong ki don ruh ki tnad treikam jong ka sorkar kum ka Block Office, PWD, Sub Divisional Officer jong ka Mawshynrut Civil Sub Division bad bun kiwei kiwei ki tnad treikam, kiba peit ïa ka roi ka par bad ka jingmyntoi jong u paitbah nongshong shnong. Kum ban pynkynmaw ba ha katei shnong ka don ruh ka ïew kaba ju long shisien shi taïew man la ka sngi thohdieng bad ka dei dei ruh ka jaka kaba kiew sted ha ka khaïi pateng ka kamai kajih ka pule puthi bad ka jingdon briew.
Ha ki snem ba la dep ki paitbah pat ki kynduh jingeh bha ban kynshew ïa ka pisa kaba ki ïoh ban lum na ka kamai kajih jong ki, namar ka dang don tang ka tnad kynshew pisa jong ka Meghalaya Rural Bank.
Hynrei, naduh u snem ba la dep sa kawei ka tnad kynshew pisa jong ka State Bank of India ka la sdang ban treikam pura, ha kaba ka la pynsuk shi ka dei ïa ki ym tang ïa ki nongkhaïi bad ki mahajon, hynrei wat ïa ki paitbah nongshong shnong jong ka thaiñ baroh kawei.
U bah S.Marweiñ uwei na ki nongshong shnong katei ka thaiñ haba ïakren bad u nongthoh khubor, u la ong ba ha ki snem ba mynshuwa ki paitbah kiba leit thep bad sei pisa ki hap ban ïeng da u laiñ da ki bun bun kynta, namar ba ka dang don tang Meghalaya Rural Bank, kaba ki paitbah ki hap ban leit thep bad sei pisa man ka por kat haduh ba katei ka tnad treikam jong ka, ka la shem shitom ban ai ka jingshakri kaba paka na ka bynra ki paitbah nongshong shnong ka thaiñ.
Hynrei, naduh ba ka State Bank of India ka la buh ïa ka tnad treikam ka la long ka jingmyntoi kaba khraw bad ka la pynsuk shibun ïa ki paitbah nongshong shnong kiba dei ki nong kynshew pisa haba ki leit ban sei ne ban thep. Nalor kata ka la pynsuk ruh ïa ki Kontraktor kiba donkam ban sei ia ki bill jong ki jingtrei jong ki. Wat la katta ruh ka SBI ka dang donkam ban thung shuh shuh ïa ki nongtrei ha katei ka tnad trei kam, khnang ba kan kham pynsuk shuh shuh ïa ki paitbah haba ki donkam.
