Shillong, Risaw 03: Ka seng Congress ka la ïathuh ba la hap ban pynkynriah noh ïa ka jingthmu jong u President ka seng u Mallikarjun Kharge ban wan jngoh ïa ka jylla Meghalaya bad ka daw ka dei na ka jingbym don jong u ha ka met kaba koit kaba khiah.
Katkum ka kyrwoh khubor ba la phah da u President ka Meghalaya Pradesh Congress Committee u Bah Vincent H Pala, u la ong ba kam pat shym la don ka jingpyndam noh ïa kane ka jingwan jngoh jong u, hynrei la hap ban shu pynkylla noh ïa ka por, ka tarik bad ka sngi kaba yn sa pynbna thymmai shen.
U Kharge, ba la 83 snem ka rta, dangshen u la hap ban leh ïa ka pacemaker surgery bad u la pynpaw ruh ïa ka jingai burom ïa ki nongkyrshan jong u ha ka social media. “Ka jingai khublei jong nga ka leit sha ki para nongtrei hapoh ka seng Congress, ki nongïalam, bad ki nongkyrshan kiba la theh ki jingkitbok kitrwiang. Nga pynpaw ka jingburom kaba naduh ka mynsiem bad nga don ka jingthmu ba shen ngan sa sdang biang ban trei ïa ki kam jong nga,” u la pynpaw ïa kane ha ka X.
Kane ka jingwan jngoh ka long kaba kongsan naba ka seng Congress ka mad ïa ki kynrum kynram ha la ïing ha Meghalaya, na ka daw jong ka jingduhnoh ïa baroh ki assembly seat na ka daw jong ka jingphet seng ki MLA barim ka seng Congress sha ka NPP.
Lah ban pynkynmaw ba u Dr. Celestine Lyngdoh, Bah Gabriel Wahlang, bad u Bah Charles Marngar ki la leit pynïasoh noh sha ka seng NPP ha u snem ba la dep, hadien pat la pynbud sa u Bah Ronnie V Lyngdoh, uba la sah satang marwei kum u MLA ka party.
