Ynda la bit la biang ka jaka, ynsa pynkynriah noh ïa ki nongshong madan ha Ïew Mawkyrwat

Mawkyrwat, Risaw 01 : Ka Ophis jong u Sankur Rikynti Khaiñ Nonglang bad Mawkyrwat Hat, kaba dei peit ïa ka Ïew Mawkyrwat, ka shnong Mawkyrwat, ki Seng Longkmie, ka VDP, ka Seng Samla Shnong, bad ha ryngkat ki kynhun sengbhalang ha ka jingïatreilang bad ka ophis jong u District Swachh Bharat Mission (DSBM), South West Khasi Hills District, ki la pynlong ïa ka jingpynkhuid paidbah ïa ka Ïew Mawkyrwat bad baroh ki bynta sawdong jong ka.
Ha ha kaba ka thong ba hakhmat eh jong kane ka long ban wanrah biang ïa ka jingkhuid jingsuba bad ka jingsngew shngaiñ hapoh ka Ïew Mawkyrwat bad ym tangkata la pynsngew ruh ba ynda la bit la biang ka jaka baroh ki nongshong madan ha ïew Mawkyrwat kin sa shah pynkynriah noh ha ka jaka ba la pynkhreh.
Shwa ban sdang ïa ka jingpynkhuid ïa ka Ïew Mawkyrwat, la pynlong ïa ka jingïalang ha jaka ïeng kali ha ïew Mawkyrwat ban pynshai paidbah halor ka jingkhuid jingsuba bad bad kumno ban teh-la-kam ïa ki jingsniew kiba kew sawdong ha kaba la khot la wer ïa baroh ki nongshong ïew bad ki nongwan ïew ba kin ïa treilang ban pynlong ïa kane ka jingthmu kum ka jingjop.
Lah ban kdew ruh ba na ka liang ka Sankur bad ka shnong Mawkyrwat ha ka jingïatreilang bad ki sengbhalang, ha ka jingïalang ba lyngkot, ki la pynshai paidbah ba ban lait na ka jingma bad ka jingkhapngiah ha surok, kan sa don ka jingpynkylla ïa ki nongshong ïew kiba ju shong ha rud surok da kaba kin sa shah pynkynriah noh sha kawei ka jaka khnang ba kan ym thud ïa ka ïaid ka ïeng jong ki paidbah kumjuh ruh ïa ki khynnah skul, namar kum ba long mynta katei ka surok kaba dei ban ïaid ki kali bad ki briew ka la long kaba khapngiah bad ka buh jingma ïa ki nongïaid nongïeng khamtam ïa ki khynnah skul.
Ym tangkata, la ong ruh ba ïa mynta ym pat shem la pynbna ïa ka jaka thymmai kaba bit kaba biang ban pynkynriah ïa ki namar ka dang don ha ka jingpynkhreh. Hynrei tad hadien ba ka jaka la long kaba biang, ynsa pynkynriah noh ïa ki nongshong madan sha ka jaka ba la pynkhreh na ka bynta jong ki.
Kiba ai jingkren kane ka sngi ki long naduh ka kong M. Kharlyngdoh kaba dei ka President jong ka Seng Longkmie Mawkyrwat, u bah W.C.D Toi, Secretary VDP, u bah Kitborsing Lyngdoh na ka Seng Samla Shnong Mawkyrwat, u bah Y.G. Lyngdoh na ka ophis Sankur, u bah Bitnam Nongsiej na ka HITO, u bah S. Marshangbai, District Programme Manager, District Swachh Bharat Mission (DSBM), South West Khasi Hills District, bad u bah R. Rymbai, na ka ophis jong u SP, South West Khasi Hills District bad kiwei kiwei.