Shillong, Nailur 29: Ka samla Bahun Nongrum, kaba dei ka Miss Meghalaya, sa shisien pat ka la wanrah nam bad burom ïa ka jylla da kaba ka la ïoh ïa ka kyrdan 1st Runner-Up ha ka jingïakob thei bhabriew ka Miss Divine Beauty 2025 kaba la tip ruh kum ka Miss Earth India 2025.
Ha ka kyrwoh khubor la ïathuh ba nalor ka jingïoh ïa ka 1st Runner Up ka samla Bahun ka la ïoh ruh ïa ka khusnam Miss Congeniality 2025.
Shuh shuh ka samla Bahun, kham mynshwa ka la mihkhmat ïa ka jylla Meghalaya ha ka rynsan ïakob thei bha briew Miss Universe India 2024 bad ka la pynpaw ïa ka jingsngewnguh ïa u Blei uba la theh ïa ka jingkyrkhu ha ka, ban ai ïa ka met kaba koit ba khiah bad ka jingkhlaiñ ha shi lynter ha ka jingïaid lynti jong ka jingim jong ka.
Halor kane ka la ai khublei ruh ïa ki bahaïing bahasem ki jong ka, ki paralok parajor kiba ïai bteng ban ai ka jingkyrshan bad jingpynshlur ïa ka manla ka khyllipmat.
Ka la ong, “Kane ka jingïoh jingithuh kam dei eh tang ïa nga, hynrei ka dei na ka bynta baroh kiba la kyrshan ïa nga naduh ka por kaba sdang,” da kaba bynrap bad ai burom ïa kane ka jingjop sha baroh kiba ïeng ryngkat lang bad ka ha ki jingïaid lynti jong ka.
