Nongstoiñ, Nailur 29: Ka Shlem ai jinghikai kaba la tip kum ka Northeast Institute of Professional Studies (NeIPS), ka la pynlong ïa ka jingïalang ban sam syrnod ïa khynnah samla kiba pass bad kiba la shah ai jinghikai lyngba katei ka Shlem.
Ïa katei ka jingïalang la pynlong ha Bishop Hall New Nongstoiñ, West Khasi Hills District ha kaba u bah Khampynjanai Kharmawlong SDO u la long kum u kongsan, ryngkat ka jingïadonlang u samla Michael Thongni CEO ka NeIPS bad kiwei kiwei.
Ka shlem ka la sam ruh ïa ki tiar seng kam seng jam ryngkat ka song pisa sha ki samla kiba la pass ïa ki jinghikai bapher bapher, kiba dei kiba duna dkhot met bad kiwei kiwei kynthup ïa kiba la pass ïa ka Fashion Designing, Chef bad kiwei kiwei kiba la kot haduh 200 ngut bad ïa katei la bei pisa lyngba ka scheme sorkar na ka MSSDS, Skills Meghalaya.
Lah ban kdew hangne ba ka jingdon jong katei ka Shlem, ka la pynïoh jingmyntoi shibun eh ïa ki khun samla ka thaiñ, khamtam ïa kito kiba la iehnoh noh ïa ki jingpule shiteng por bad wat haba kim shym la lah ban pyndep ïa ki jingpule.
Bun napdeng jong kiba la pyndep ïa ki jingshah hikai lyngba katei ka Shlem, mynta ka kynti shibun ki samla kynthei bad Shynrang ki la lah ban ïeng ha la ki kjat da kaba seng kam lajong.
