U Conrad Sangma u dei ban sangeh shisyndon ban long u tyngshop ka BJP : Abhishek Bannerjee

Shillong, Jylliew, 29: U National General Secretary jong ka All India Trinamool Congress (AITC) u Abhishek Banerjee ha ka sngi Balang u la kyntu ïa u Myntri Rangbah ka Jylla u Conrad K Sangma ba u dei ban sangeh noh shisyndon ban long kum u tyngshop jong ka Bharatiya Janata Party (BJP).
“U Conrad Sangma ïa mynta u la long u Conman Sangma. Lada ka burom ka ijot ka dang sah ha phi, sangeh noh ban long tyngshop…..” ong u Abhishek haba kren ha ka jingïalang ba la pynbna ïa ka jingpynrung dkhot hadien ba ladep plie ïa ka ophis treikam jong ka party ha Lower Lachumiere.
Ha kane ka jingïalang la sakhi lang ruh u President ka AITC Meghalaya State Unit u Bah Charles Pyngrope, u Nongïalam ka Liang Pyrshah u Dr. Mukul Sangma bad u nongpeit ïa ka AITC Meghalaya u Dr. Manas Ranjan Bhunia.
U la ong ba ka long kaei kaei kaba jah burom ïa u Myntri Rangbah uba bunkam tang ban leit bamja miet sha Delhi katba ka jylla jong u ka mad ïa ki jingjia basngewsih na ki jingwan lynshop ki bor mariang bad ki jingeh ba laiphew jait.
“Ki la thaw ïa ka kynhun kaba la jer kyrteng Meghalaya Democratic Alliance (MDA) hynrei u Conrad Sangma u la dei ban pynkylla noh ïa ka MDA kum ka “My Development Alliance” namarba lada kino kino ki kam pynroi kin jia long hapoh kine ki san snem, kin dei ki kam pynroi jong u Conrad Sangma,” u la ong.
Une u National General Secretary ka AITC u la kynnoh ruh ba ka Sorkar MDA ba la ïalam da ka NPP ka la shu ai ei ïa ka khyndew ka shyiap jong ki paidbah sha Assam tang ban pynhun ïa ki kynrad ha Delhi.
“Ha ka kyrteng jong ka jingïapynbeit pud, phi la ïohi ïa ki jingjia bym lah ban pdiang haba kane ka Sorkar ba mynta ka la aiti ïa ka khyndew ka shyiap sha ka Assam. Ïa kane la leh tang ban pynsngewbha ïa ki kynrad ha Delhi,” u la ong.
“Kito kiba im ha Meghalaya bad kiba la ïakhun dohïap ban ïoh ïa la ka jong ka jylla kynsan kynsan ki la shah khynñiat ban long ki nongshong shnong jong kawei ka jylla. Sa kaei pat kaba kham jah burom nalor kane. Ka Sorkar ka bym don wat tang khyndiat ruh ïa ka jingburom halor ka khyndew ka shyiap kam don hok wat tang ban bat ïa lakam synshar,” la takraiñ u Bannerjee.
Haba kynthah shuh shuh ïa u Myntri Rangbah u Abhishek u la ong, “hato phi la ju peit bha ïa ka rukom pynkhih met jong u haba u kren ha ka jingïakynduh briew ha Delhi, khamtam haba u leit ïakynduh ïa ki heh nongïalam jong ka BJP. U dei u Myntri Rangbah ba la jied da u paidbah. Phi rah ïa ka jingangnud, ka jingkyrmen bad ka burom jong ki 35 lak ngut ki nongshong shnong ka Meghalaya hynrei da kumne phi hap ban mane ïa ki nongïalam ka BJP, hato dei kane seh kaba ki paidbah nongshong shnong ka Meghalaya ki ïoh, hato dei kane kaba phi la pynjop ïa u, hato dei kane kaba phi khmihlynti na u?
U la kyntu ïa ki paidbah nongshong shnong jong ka jylla Meghalaya ba kin ai jingkyrshan ïa ka AITC da kaba kyntait noh ïa ka sorkar bamsap kaba bat ïa u lakam synshar ha ka hynriew bnai ki ban sa wan. “Lada ka NPP ka dei u khñiang jingpang, ka Trinamool ka dei ka dawai pynkoit,” ong u Bannerjee.
“Nga kular ïa phi ba ka Trinamool kan ïakhun haduh ban da mih khatduh ka snam bad kan ym pyndem hakhmat ki briew kiba don ha ka bor synshar ha Delhi. Ngi long kiba kloi ban nguh hakhmat ka itkiar jong ki paidbah hynrei ym ïakhmat ki briew kiba bat ïa ka bor ka iktiar-kata ka dei ka jingïapher,” u la ong.
U la ong shuh shuh ba ka Sorkar MDA hapoh ka jingïalam jong u Conrad Sangma ka la nang rit kum ka tynshop ha ki kti jong ka BJP.
“(Namarkata) nga kular ïa phi ba ha ki hynriew bnai ban sa wan, phin sa ïoh ïa ka Sorkar ba thymmai, ka Meghalaya kan synshar ïa ka Meghalaya, ka Bengal kan ym synshar ïa ka Meghalaya. Nga nud ban kop, lada don mano mano na ki nongïalam ka BJP ha ka ri kiba shlan ban wan sha Meghalaya bad ban ong ka dei ka Gujarat, ka Madhya Pradesh bad ka Delhi kin ym don bor eiei ruh em ban synshar halor ka jingim jong ki nongshong shnong ka Meghalaya. Ïa ki Khasi yn synshar hi da ki Khasi, ïa ki Garo yn synshar hi da ki Garo bad ïa ki Jaiñtia yn synshar hi da ki Jaiñtia, ïa ka Meghalaya yn synshar hi da ka Meghalaya. Kane ka dei ka jingkular kaba ka Trinamool Congress ka ai ïa phi,” u la ong.
U Abhishek u la ong ba dei tang ka AITC ka party kaba lah ban ïakhun ïa ka BJP.
“U Dr. Sangma bad u Bah Pyngrope bad baroh ki MLA ki la shim ïa ka rai ban pynhiar khet ïa ka Sorkar NPP bad ngim don rynsan, baroh ki la wan sha ka AITC. Baroh ki MLA ki dei ki khun jong ka ri bad kin trei na ka bynta jong phi,” u la bynrap.
Haba pynpaw ba ka por ka la ih ïa ki paidbah ban ai jubab ïa ka Sorkar MDA halor ka jingshah shukor ha ki saw snem shiteng, u la ong, “u Conrad Sangma u la kiew sha ka por da ki jingkular ba shukor bad ki jingkular thok.”
“Ka Sorkar Double Engine kan ym kem ïano ïano. Ka Sorkar Pdeng ka lah ban lute katba mon ïa ki marpohkhyndew na Meghalaya katba ki kwah, ki pulit ka Meghalaya kin ym shah tohkit bad u Conrad Sangma un leh katba u mon, ka CBI kan ym pyndik ïa u, kane ka dei ka jinglute ba ar jingmut. Ngi hap ban ai ka jubab ïa kine ki briew kiba la shukor ïa ngi,” u la ong.
Une u nongïalam ka AITC u la ong ba ka Sorkar NPP ka la iehbeiñ haduh katta katta ïa ka jylla namarba ka la shu long tang kum ka dur bad ka tynshop hakhmat ka BJP.
“Ka jaka shong ki lyoh ka la long ka bneng jong bamsap, ngi hap ban pynkylla ïa kata,” u la bynrap.