Bym seisoh ka jingïakren bad ka Sorkar, bteng ki nonghikai ban sahmiet ha surok

Shillong, Jylliew, 29: Ka jingkhot ïakren jong u Myntri ka tnat Pule Puthi ka Sorkar Jylla u Bah Lahkmen Rymbui ïa ki nongïalam jong ka Federation of All School Teachers of Meghalaya (FASToM) ha ka sngi Balang ka la long kaba pulom namarba ha ka jingïakren une u Myntri um shym la lah satia ban ai ïa kano kano ka jingkular.
Kane ka jingkhot jong u Myntri ïa ki nongïalam ka FASToM ka long hadien ba la dap 24 kynta ba ki nonghikai skul Adhoc ki la sahmiet ha lynti ïaid kjat kaba don mar pyrshah bad ka ophis Main Secretariat, Shillong.
Kum ban shu pynkynmaw, ki nonghikai skul Adhoc ki la mih biang sha surok ban pynlong ïa kane ka jingïakhih ha nongbah Shillong bad ha Tura ka long hadien ba ka Sorkar Meghalaya Democratic Alliance (MDA) kam shym bat ïa la ka jubanlak ha ka jingïakren kaba la long hapdeng u Myntri Rangbah ka Jylla u Conrad K. Sangma bad ki nongïalam jong ka FASToM ha ka 12 tarik, Jymmang.
“Ha ka jingïakynduh bad u Bah Lahkmen Rymbui, ngi la shem ba ka Sorkar ka la ïakren ïa ka jingdawa jong ngi hapoh ka jingïalang Kynhun Myntri tangba kim pat lah ban shim rai eiei. U Myntri u la ai ka jingkular ba yn sa pynkiew ïa ka tulop jong ngi, tangba ngi la pynpaw ba ngim pat hun ïa ka jingkular kaba ngi la ïoh ha ka jingïakynduh ïa u Myntri Rangbah ha ka 12 tarik, Jymmang, 2022 ba yn sa pynurlong ïa ki jingdawa jong ngi hadien ki lai tylli ki jingïalang Kynhun Myntri,” ong u Nongaiktien jong FASToM u Samla Mayborn Lyngdoh ha ka jingïakren bad ki lad pathai khubor.
“Baroh ki jingïakren ki ladep bad ngi la ïoh ruh ka jingkular hynrei kaba ngi kwah mynta ka dei ka Hukum ba la pyntreikam. U Myntri ka tnat Pule Puthi u la ïathuh ba ka Sorkar ka la leh katba lah na ka liang jong ki bad ngi la ong ruh ba ngin ïai ap beit bad sahmiet hakhmat ka Secretariat katba ka Sorkar kam pat ai ïa kata ka hukum ba la pyntreikam ïa ka jingdawa jong ngi,” u la ong.
Haba kynthoh ïa ka jingleh kuman jong ka Sorkar MDA ba la ïalam da ka National Peoples Party (NPP) une u nongïalam jong ka FASToM u la ong, ‘ka Sorkar ka la shim noh ïa ka burom na ngi ki nonghikai.”
Ha ka nophai sngi, u National General jong ka All India Trinamool Congress (AITC) u Abhishek Bannerjee uba la wan iuhkjat ha nongbah Shillong u la leit jngoh bad ai mynsiem ïa ki nonghikai skul Adhoc ryngkat ka jingsynran lang jong u President jong ka AITC, Meghalaya u Bah Charles Pyngrope bad u Nongïalam jong ka Liang Pyrshah u Dr. Mukul Sangma bad kiwei kiwei de ki nongkitkam jong ka party.
Nalor kine, u MLA jong ka BJP Meghalaya State Unit u Bah Alexander L. Hek ruh u la leit jngoh ïa kine ki nonghikai bad kular ruh ba un sa ïakren ïa kane ka jingeh jong ki ha ka jingïalang jong ka party ka ban sa long shen.