Naduh u bnai ban wan, tyrwa ka Sorkar ïa ki kompeni ban trei noh mynmiet haduh mynstep

Shillong, Nailur 28 : U Symbud Myntri Rangbah ka Jylla ba peit ïa ka tnad PWD, Bah Prestone Tynsong u la ong ban pyntikna ba ka jingpyntrei ïa ka surok Shillong – Dawki kan dep ha ka por ba la buh, donkam ïa ka kompeni ba kan trei noh mynmiet la kumno kumno naduh ka por 6:00 baje janmiet haduh ka por 6:00 baje ne 7:00 baje mynstep.
Ïa kane u Symbud Myntri Rangbah u la kren ha ka jinghiar jurip ïa ka jingpyntrei ïa katei ka surok ha ki bynta sharum jong ka Laitlyngkot hadien ba ka la dep ka jingtwa kaba jur bha ha kine ki shisngi arsngi.
Haba kren bad ki lad pathai khubor, u Bah Prestone u la ong, Kumta, ngi la nang pyrkhat ba naduh u bnai ban wan ki (kompeni) kin trei noh mynmiet lehse kin sdang ban trei noh naduh ka por 6:00 baje janmiet haduh 6:00 baje lane 7:00 baje mynstep ba kin ïoh ban pynleit jingmut pura ha ka jingtrei namar lada donkam kano kano ka jingpynbthei ruh kin ïoh ban pynkhuid.
U ong ruh ba kumba long mynta lada ki ailad tang 3-4 kynta ha ka shisngi ban trei katban da ïoh lad ban pynkhuid ïa ki maw ki khyndew ka por ban plie ïa ka jingïaid ki kali paidbah ka la dei.
Kumta kane ka long kaba shitom bha. Ïa kane ngin dang ia shim ïa ka rai bad ngin shong ïa ka jingïalang bad ka NHIDCL ryngkat ki bor distrik, na ka PWD bad ka kompeni baroh kawei ba ngin pynshlur ïa ka kompeni ba kan trei noh ha ka por mynmiet ba kin ïoh por la kumno kumno 12 kynta – 13 kynta shisngi ban trei, u la bynrap biang.
U Symbud Myntri Rangbah u la ong ruh ba ka thong jong ka sorkar jylla ban pyndep ïa katei ka surok ka long h au Nohprah 2026. Kumba peit hi u Geneal Manager jong ka NHIDCL bad ki kompeni ki don hangne ki ong ba kin lah beit ban pyndep tangba kumba nga ong, ki hap ban ïoh kham bun kynta ban trei ba kin lah ban pyndep ïa ka kam ha ka por ba la buh.
Ha kawei pat ka liang, u Symbud Myntri Rangbah u ong ba u i hun ïa ka jingïaid ka kam. Ka rukom treikam bad ka jingstet ka kam ka long kaba biang khamtam ka package 2, ka package 4 bad ka package 5 nga ïohi ka kam ka long kaba i hun. Kumta nga kyrmen skhem ba ka kam kan dei ha ka por kaba la buh.
Nangta u la ïathuh ruh ba wat na ka liang ka NHIDCL ha ka jingïalang buddien kam kaba long ha ki khyndiat sngi ba la dep ki la ai ka jingkular ban pyndep ïa ka kam ha u snem 2026 kaban long ka jingpynsuk pat ïa ki paidbah ka thain baroh ynda ka surok ka la dep pura.