Shillong, Nailur 28: U President ka Indian National Congress u Mallikarjun Kharge ha u bnai ban wan un sa wang jngoh ïa ka jylla Meghalaya ban shim jingkheiñ halor ka jinglong jingman jong ka seng Congress ha kane ka jylla.
Kumba ka long mynta ka seng Congress ha ka jylla ka dang sdang ïa ka kam ban tei thymmai ha kaba ki la don ki jingïakren kiba dang ïaid mynta ha Delhi ban rai ïa ki kam ha kine ki por ban wan.
Lah ban ong ba ka jinghiar kynsan jong ka seng Congress ha Meghalaya ka la long ha kine ki 3 snem ba la leit ha kaba 3 ngut ki MLA ka Congress kiba kynthup ïa u Dr. Celestine Lyngdoh, u Bah Gabriel Wahlang bad u Bah Charles Marngar ki la leit ban pynïasoh noh ïalade sha ka seng National People’s Party kaba la wanrah shuh shuh ka jingduna ki MLA ka seng sa tang uwei.
Halor kane, ka jingphet seng ka la wan biang hadien ba u MLA ka Mylliem na ka seng Congress uba la sah satang marwei, u la leit lang ban pynïasohnoh sha ka seng NPP kaba la pynlong syndon nod ïa ka jingdon ki MLA ka Congress hapoh ka Ïing dorbar thaw aiñ ka jylla.
Kane ka jinghiar arsut ka seng Congress ha Meghalaya ka la long ruh shi bynta na ka jingtlot ka jingdon ka seng ha kine ki jylla ka thaiñ shatei lammihngi. Ka jingbym lah ka party ban ïada ne khanglad ïa ka jingkyntiap seng bad ka jingpulom jong ka ban ïoh u ne ka nongïalam ba biang ka la nang pynlong shuh shuh ïa ka seng ba kan hiar kyrdan shuh shuh.
Katkum ki tyllong khubor ka jingthmu ka Congress ban sdang tei biang kum ki jingpyrshang la ïohi ba kan dei ka jingïakhun kaba khatduh ban pyrshang pynkhie im biang ïa la ki jong ki nusip bad ka bok ha ka jylla.
“Ki nongïalam ka National party ka seng Congress la ïoh jingtip ba ki la shim khia bha ban ïasyllok shaphang la kin pynkylla ïa ka jinglong nongïalam ne ban pynkhlaiñ ïa ki rukom treikam ka party ha Meghalaya,” ong ka tyllong khubor.
Ka tyllong khubor ka bynrap ruh da kaba ong ba ka jingwan jngoh u Kharge sha Meghalaya la khmih lynti ba kan long ka jingjia kaba kongsan bha, ha kaba une u president ka party la ong ba un sah ha ka jylla kumba 2 haduh 3 sngi eiei. Kane ka jingwan jngoh la ïohi ba ka long kum ka dak jong ka jingangnud ka party ban pynkhie im biang ïa la ka jong ka bok ha kane ka jylla.
Naba ka Congress party ka dang ïakhun ïaksaid ban pdiang ïa kane ka jinghiar arsut jong ka ha Meghalaya, ka long ruh kaba shai ba ka party ka donkam ban shim ïa ki sienjam ban pynkhie im biang ïa la ki jong ki hok bad ka nusip bad ban pynïasoh bad ban ïatreilang biang bad ki nongshong shnong ka jylla.
