Shillong, Nailur 28 : Ka Phlim Khasi “Ha Lyngkha Bneng” (The Elysian Field) ba lah pynbit pynbiang ne direk da u Bah Pradip Kurbah sa shisien ka la ïoh rynsan ha Manila, Phillipines ha kaba kane ka phlim ka la shah jied ban pyni nyngkong eh ha ka Cinemalaya 21 premier Independent Film Festival kaban long ha ka 03 tarik u Risaw 2025 ha ka por 7 baje janmiet ha Red Carpet Cinemas, Edsa Shangri-La, Manila, Philippines.
Ka jingshah jied jong kane ka phlim khasi ha kane ka Film Festival ka long ka burom kaba khraw ïa ka Jylla bad wat ïa ka thain Shatei Lammihngi ruh namar ba kane ka rynsan pyni phlim ka dei ka rynsan kaba heh bha ha dewbah Asia bad kumta ki briew kiba na bar Ri kin ïoh ban tip shuh shuh ïa ka Jylla ka jong ngi lyngba kane ka phlim.
Lah ban kynmaw ba kane ka Phlim ‘Ha Lyngkha Bneng’ ha u bnai Ïaiong mynta u snem ka jop haduh lai tylli ki khusnam ha ka 47th Moscow International Film Festival ha kaba ka la ïoh ïa ka Golden Saint George for Best Film bad ka Silver Saint George for Best Director bad ka NETPAC Award for Best Asian Film.
