Shillong, Nailur, 24: Ka Meghalaya Greater Shillong Progressive Hawkers and Street Vendors Association (MGSPHSVA) ka la kynthoh tyngeh ïa ka Shillong Municipal Board (SMB) da kaba kynnoh ba kam shym la lah satia ban ai ïa ki Certificates of Vending (CoV) sha ki nongdie madan ha ka thaiñ Khyndailad, kaba la wanrah ïa ka jingduhnong haduh katta katta ïa ki nongdie madan.
Ka nongïalam jong ka TUR, ka Kong Angela Rangad, haba kren na ka bynta ka MGSPHSVA, ka la ong ha ki lad pathai khubor ha ka sngi Balang ba bun ki nongdie madan kim shym la ïoh ïa ka CoV bad kane ka la ktah bha ïa ka kamai kajih jong ki la palat ar bnai shiteng.
Ka la buh jingkylli ruh ïa ki kam leh be-aiñ jong ki bor synshar, da kaba kdew ïa ki nuksa ba ki briew ki bym shym la shah leh sorjamin ki la ïoh ïa ka CoV, katba ki nongdie madan ba dei hok kiba ladep shah leh sorjamin kim shym la rung kyrteng satia.
Ka Kong Rangad ka la kdew ruh ïa ki jingbakla ha ka thup jong ki nongdie madan ba ladep ai jingmut, kynthup ïa ki briew kiba la pynpaw ba kim don wat haba ki don bad kito kiba la pynpaw ba ym shym la sorjamin wat haba ladep sorjamin. Ïa kane ka thup la pynmih ha ka jingïalang jong ka Sub-committee ba la thaw da ka Provisional Town Vending Committee (PTVC) kaba la long ha ka 22 tarik, Nailar.
“Kumno ngin shah ïa kane ka rukom treikam thurmur?” ka la buh kylli.
Ka nongïalam jong ka TUR ka la kynnoh ruh ba ka don ka jingbamsap ha ka rukom treikam, da kaba kdew ïa ki jingjia ba ki bahaïing hasem jong ki nongkitkam jong kawei pat ka seng ki la kynthup ban ïoh ïa ka bynta ka CoV watla kim shym la shah leh sorjamin.
“…ki briew ki bym pat ju leit die jingdie ha ka jingim jong ki, ngi la ïohi ba ki don san-hynriew ngut ki kyrteng kiba dei ki bahaïing hasem jong uwei u nongkitkam jong kawei pat ka seng, la pynpaw ïa ki kyrteng jong ki. Mynno ki aplai bad balei la pyrkhat shwa ban pynrung ïa ki ha ka Recomended List namarba ym shym la leh sorjamin ïa ki wat tang shisien ruh.”
“Bad hangne ki don ki nongdie madan kiba dei hok, kiba la lap ba ki don ha ka por ba la leh sorjamin, ki bym shym la ïoh ïa ka CoV, don napdeng jong ki kiba dang lap ïa ki kyrteng jong ki ha ka thup bym shah ai jingmut bad kito kiba don ha ka thup ba la shah ai jingmut ruh haduh mynta ka sngi hadien ba la pynshisha bad ai ïa ka thup mynta ka sngi hangne kim shym la ïoh ïa ka CoV,” ka la ong bad bynrap, “ngan ïathuh shuh bad ngan ai ha phi ïa ka jingkheiñ ba ki don 17 ngut ki briew kiba ym shym la don ha ka jingai jingmuut, ki bym pat leh ïa ka jingsorjamin. Hynriew ngut na ki, ki dei ki briew kiba ka kyrteng jong ki, ka paw hadien ba la pynmih ïa ka thup kyrteng. Mynta uwei na kine u la shong die jingdie khlem da don ïa ka CoV katba kiwei pat kiba dei hok kim ïoh.”
“Mynta ka jingkylli kaba mih ka long balei ka don ka jingleh beaiñ? Mano ba donkti? Hato kane kam dei ka bamsap,” ka la ong.
Ka seng ka la pynksan ruh ba ka jingbym don jong ka CoV ka la wanrah jingeh shibun ïa ki nongdie madan, kiba la ïakynduh jingeh nalor ba ki hap ban pyndap pynbiang ïa ki jingdonkam ha ing hasem.
Ka Kong Rangad ka la ong ruh ba ka jingïarap pisa kaba kot T.10,000 hajar kaba la ai da ka Sorkar Jylla sha ki nongdie madan khamtam sha kito ki bym pat ïoh ïa ka CoV, kam pat long kaba biang haba pyrkhat ïa ka jingeh ba ki la ïakynduh.
Ka la pynkynmaw ruh ïa ka jingkren jong kawei ka nongdie madan kaba la hap ban pynpep kolej (kaba la thmu ban pule ïa ka B.Sc) na ka daw ka jingbym dap pisa ban siew ïa ka bai Admission.
Ka seng ka la dawa na ki bor ba dei peit ban shimkhia mardor ban weng ïa kine ki jingeh bad ban pynthikna ba ki nongdie madan ki dei ban ïoh ïa ka CoV ha ka rukom treikam kaba khuid bad kaba shai.
Ki la dawa ruh ban ai ïa ki jingdonkam na ka bynta ki nongdie madan, kynthup ka jingkdew kyrteng ban pyntip ïa ki nongjngohkai pyrthei bad ïa ki nongthied sha ka jaka ba don ka iew ki nongdie madan.
Ka die ka thied ka la hiar haduh katta katta bad ka Sorkar kam shym la pyrkhat wat ban buh ïa ki jingthoh kiba kdew bha shano ka iew die madan ka don.
“Ngi ïohi ïa kine ki jingpynbna ba itynnad baroh kylleng ka Sor ngam tip aiu kine ki jingpynbna ki pyrshang ban pynbna wat ha Khyndailad, dei ban shu ai tang da ka jingpynbna kaba lyngkot kaba pynsuk ïa ki nongjngohkai pyrthei bad kiwei kiwei hynrei wat ïa ka kam kaba suk ruh kim leh satia,” ka la ong.
Ka seng ka la pynpaw ïa ka jingsngewkhia halor ka jingpynkynriah ïa ki nongdie madan, da kaba kdew ïa kawei ka kyndon ha ka aiñ kaba dawa ban pynkynriah sha ka jaka kaba lah ban ïoh kamai. Ki la buh jingkylli hato ki jaka pynkynriah mynta ki lah neem ban pynmih ïa kane ka jingdonkam, haba bun ki nongdie madan ki la pyntip ba ka die ka thied ka hiar bha mynta da ki bnai.
“Ka don ka kyndon katkum ka aiñ kaba ong ba phi donkam ban pynkynriah ïa ki sha ka jaka kaba lah ban pynmih ïa ka kamai jong ki. Ka dei ban kham bha ne lym kumta ka dei ban long ha kajuh ka kyrdan bad kaei kaba ki kamai mynshuwa. Mynta ngi tip ba ka hiar bha la bun bnai. Kumta ka jingkylli ka long kumno ngin leh,” la pynpaw ka Kong Rangad.
