Khliehriat, Nailur 24: ka Jaiñtia National Council Central Executive Council (JNC CEC) mynta ka sngi hapoh ka Jingïalam u General Secretary u bah Wanshwa Suting ka la leit ban ïakynduh bad u EM uba dei peit ïa ki kam khaïi pateng ha Jaiñtia Hills Autonomous District Council, u bah Jesse Suiam ha kaba ka seng ka la pynsngew ïa ka jingsngewkhia kaba khraw ha kaba ïadei bad ka kam khaïi kaba lah sdang ban shah knieh kynthet ha ki briew kiba nabar bad ka jingjyllei ki dukan jong ki briew kiba na bar ha East Jaiñtia Hills.
Ka seng ka la pynpaw ka ki briew kiba na bar ki la knieh ïa ki kam khaïi ha kaba ki dukan ki la dap lut sa tang da ki briew kiba na bar kiba longtrai kumta halor kane ka seng ka la buh da ka jingthoh ne ka dorkhas hakhmat u EM ha JHADC.
Ha ka dorkhas ka seng ka la pynpaw bad ong ba “Ngi kum ki trai ri trai muluk ngi la long pynban tang kum ki nongthied, haba phai sha ka kam bylla sngi ruh lah dap sa tang kiba nabar, kane ka buh ïa ka pateng jong ka Ri ha ka jingma kaba khraw lada ki Dorbar shnong, ki dorbar elaka lem bad ki bor jong ka JHADC kim leh eiei ha ka por ba biang”.
“Ka JNC da ka jingsngewkhia ka kyrpad jur ïa ka tnat jong ka JHADC kaba dei peit ïa kane ka bynta ha ki kam khaïi pateng ban pyrkhat ba kumno ban tehlakam noh ïa ka jingroi jong ki dukan bad ki briew kiba na bar, khnang ban ioh lad ban trei hi da ki trai ri trai muluk khamtam namar kan buh jingma ïa ka pateng ban wan” pynpaw ka seng.
La bynrap ruh ba lada ka JHADC, ki dorbar Shnong, Kim shimkhia ïa kane ka jingpynsngew jong ka seng, ka JNC nangne shakhmat kan nym long shuh tang ka nongpeitkai hynrei kan sa ai bor ïa ki shipai jong ka seng ban khynra lut ïa ki dukan jong ki bar jylla ha kylleng ka Ri Jaiñtia.
La ong ruh ba ha kaba ïakren bad ki nongialam ka seng, na ka liang u EM u la kular ba ka tnat jong u ka kloi ban ïa treilang bad ka seng bad u la kular ruh ban leh ïa kaba donkam.
“Sa kawei ruh ka mat ba ka seng ka la rah hapoh ka ïing treikam ka JHADC kadei ba ka seng ka la dawa na ka JHADC ka dei ban wanrah noh ïa ka tnat revenue ka JHADC hapoh East Jaiñtia Hills District khnang ban pynsuk ïa ka rukom ai jingshakri bad ruh ban pynsuk ïa ka leit ka wan jong ki paid nong East Jaiñtia khamtam u duk u suk, namar da kaba don kane ka tnat hapoh East Jaiñtia katno tam Kan long ka jingkyrkhu bah bad ka jingmyntoi ïa ka thaiñ”.
“Na ka liang ka JHADC ka la ong ba kan ïaleh katba lah ban pynurlong ïa kitei ki jingdawa ka seng bad ka long ruh kaba kloi ban leh bha ban wad ki lad ki lynti na ka bynta kine ki mat jingdawa ba ka seng ka la pynpaw”
