Ka Pynursla Civil Sub Division kaba nyngkong ban ïoh Mini Secretariat

Shillong, Jylliew 29 : U Symbud Myntri Rangbah ka Jylla, Bah Prestone Tynsong ha ka sngi Balang u la ong ba ka sorkar jylla ka la mang 18 klur tyngka na ka bynta ban tei ïa ka mini secretariat ha Civil Sub-Division, Pynursla.
Haba kren bad ki lad pathai khubor, u Bah Prestone u la ong ba ïa katei ka 18 klur yn pyndonkam na ka bynta ban tei ïa ka mini secretariat, ka quarter jong ki MCS, SDSEO kumjuh ruh na bynta ki nongtrei ha ki ophis sorkar ha kaba ïa ki jaka la dep ban ïoh lypa kaba la ai da ka Raid Shabong.
Na ka liang utei nongmihkhmat uba la jop la bun snem bha na ka Pynursla constituency, u la ong ruh ba ka jingkynnoh ba katei ka sub-division kam pat lah ban treikam bha kadei namar ki dang don shibun ki kam lane ki tnad kiba hap ban pynbha bad kyntiew na ka por sha ka por.
U ong ruh ba ïa mynta hi ka civil sub-division ka treikam pura ha kaba ki tnad bapher bapher ki la don kynthup ïa ka SDO Civil, EAC, Supply bad Registration Department na ka bynta ka jaka puta bad ruh wat na ka bynta kiba aplai ïa ka ST certificate.
“Ka long kaba bakla ban shu kynnoh ba ka Pynursla civil sub-division kam treikam katba ha ka jingshisha pat ki paidbah ki la myntoi shibun. Hynrei kumba nga ong ki dang don bun bha ki jingdonkam ban pynbha bad ka sorkar ruh ka dang pynkhreh ban wanrah kham bun shuh shuh ki tnad na ka bynta ban pyndep pura ïa katei ka sub-division,” u la bynrap biang.
La pyntip ruh ba mynta ki la khot ruh ïa ka tender na ka bynta ban tei ïa katei ka mini secretariat ha katei ka sub-division bad tang shu dep ïa kane, ka jingtreikam kan long noh kaba paka.