Shillong, Jylliew 29 : Mynta ka sngi ki Pulit ki la rah ïa ki saw ngut ki runar shoh briew kiba la shah kem na Jaiaw hakhmat ka ïing bishar bad ka ïing bishar ka la rai ban set ïa ki san sngi ha byndi ki pulit khnang ban ïoh tohkit bniah bha ïa ki da ki pulit ban ïoh kem sa ia kiwei kiba ïadon kti lang.
Kat kum ka jingpyllait khubor na u SP jongka East Khasi Hills u bah Sylvester Nongtnger la ïathuh, ha katei ka 24 tarik shi kynhun ki briew ki la shong da ki thuk thuk bad haba ki la shah bat ha u pulit pynïaid kali ha ka lad ban rung sha ka surok ba ïaid lyngba ka ïing I Bah S.D Khongwir kata ha Mawlai Iewrynghep namar ba ki khlem phong helmet ki la hiar bad shoh ïa utei u pulit pynïaid kali. Nangta ynda la poi ha Mahari Petrol Pump bad lap ïa u nongleit rah bam ka Swiggy ki la shoh sa ïa u bad hadien kane ki la kiew sha ki thaiñ Jaiaw Pdeng bad rung ha ka ES Restaurant bad shoh sa ïa ki arngut ki samla pule kiba na Kerala kiba dang ïadep bam jingbam ha katei ka restaurant. La ujor da ka FIR ha Lumdiengjri bad Mawlai Police Station bad la rejister case ha baroh ar ki Police Station. Ha Lumdiengjri PS C/No. 65(06)2022 U/S 341/324/427/34 IPC, 66(06)2022 U/S 341/506/324/34 IPC bad Mawlai PS C/No 45(06)2022 U/S 353/323/427/34 IPC.
Hadien ba la thikna bha ïa ka jingdonkti ki sawngut na ki dur ba la ïoh na ka CCTV bad jingbatai ki nongsakhi ïaka jingjia la kem ïa kine ki sawngut. Ha ka jingtohkit bniah jongki pulit ki la phla ba ki donkti ha kitei ki kam runar. Ki pulit ki dang tohkit bniah bad dang thwet jur ban ïoh kem ïa kiwei pat kiba ïadon kti. Wat la ki lah ban phet rieh ki pulit kin ïoh kem beit namar ïa uwei napdeng kine kiba shah kem ruh la ïoh kem da ki pulit na ka jaka ba u phet rieh sha Williamnagar ong ka khubor pulit.
