Shillong,Jylliew 29 : U MLA ba rim jongka South Tura, u John Lesslee K Sangma u la pynïasoh mynta ka Sngi Balang sha ka BJP ha ophis kane ka party hangne ha nongbah Shillong. Kane ka jingpynïasoh jongu ka long ba un ïakhun pyrshah ïa u Myntri Rangbah u Conrad K Sangma uba dei u MLA na kane ka Constituency.
Haba ïakren bad ki lad pathai khubor u John Lesslee u la ïathuh “ Nga la kylli pyrthew bha na ki paid ka rilum Garo kynthup ïaki nongialam jong nga bad ka jubab kaba nga ïoh ka long beit bad ym lah ban len ba ka BJP kan dang ïai bteng beit ban synshar ha ka sorkar pdeng sa kumba 20 snem ei ei mynta. Kumta lada ka long kumta nga sngew balei ma ngi ki nong Meghalaya ngin duh ei ïa ki jingpynroi pynpar. Balei ngim phai khmat noh sha kane ka party kaba synshar ha ka sorkar pdeng ban ym duh ki jingmyntoi. Dei na kata ka daw nga sa rai ban rung sha ka BJP namar nga kwah ban wanrah ïa ka roi ka par ïa ki paid Garo bad ïa ki nong Meghalaya hi baroh”.
U la ong ki samla ki la lamwir bym ïoh kam ioh jam, ki surok la isynei ban peit, ki jaka sumar pang ruh ki dang donkam ïa ki kor ki bor jingsumar kiba biang bad bun kiwei kiwei.
“ Kaei kaba la jia ha Assam ka ai mynsiem ia nga ba ngan ïaid shaphrang ban ïadon ha ka BJP ban wanrah ïa ka roi ka par hapoh ka jylla” ong u Sangma.
U kwah ruh ban ïakhun na ka South Tura Constituency kaba u la mih khmat teng bad long MLA mynta da u Myntri Rangbah ka jylla u Conrad K Sangma.
“ Tangba wat la katta ruh nga ieh haka jingstad ki nongïalam ka party la ki kwah ne em ïa nga ban ïakhun” ong u John.
Haba la kylli balei u khlem pynïasoh sha ka NPP u la ong “ Baroh phi ïatip ba u Myntri Rangbah u mihkhmat na katei ka constituency kumta phi tharai kin ai tiket ïa nga lada nga rung ruh. Nga kwah ban ïamih madan bad ai ki paidbah kin rai. Lada ki shem ba u Conrad u trei te ain kin jied ïa u hynrei lada u khlem trei ai kin rai ki paidbah namar nga kwah ban ïakhun bad ailad ïa ki paidbah ba kin rai la kin kyrshan ïa nga ne ïa u Conrad kata lada ka party ka ibit ban ai tiket ïa nga”.
