Shillong, Nailur 23: U Myntri ka sorkar uba khmih ïa ka tnat Animal Husbandry and Veterinary, Arts & Culture u Bah Sanbor Shullai ha ka sngi baar u la ïakynduh ïa u Myntri Rangbah ka Assam u Himanta Biswa Sarma bad pynpaw ka jingsngewlem halor ka jingkhlad ba khlem pat dei por jong u nongrwai ba pawnam ka Assam u Zubeen Garg.
U Bah Shullai, uba dei ruh u nongïalam ka BJP bad u MLA ka South Shillong, u la ong ba ka Meghalaya ka ïasnohktilang bad ka Assam bad baroh kawei ka thaiñ ban pynpaw ka jingsngewsih halor kane ka jingduh kaba khraw.
U la ong ba ka sap, ka jingsngewtynnad bad ka jingaiti jong u Garg ha ka tem ka rwai ka la ieh ïa ka dak kaba pynpaw ïa ka jinghiar pateng ka jingriewspah jong ka kolshor ka ri.
“Lyngba ka tem ka put jong u, u la tei ïa ki jingkieng ha kylleng ki jylla jong ngi bad wanrah ïa ka mynsiem jong kane ka thaiñ shatei lammihngi ban ithuh ha ka ri bad ha ka pyrthei,” pynpaw u Bah Shullai.
“Ha ka kyrteng jong ka sorkar Meghalaya bad ki nongshong shnong ka jylla, nga pynpaw ka jingsngewlem ïa ka ïing ka sem jong u, ki paralok bad kiwei kiba don ka jingïadei bad u,” ong u Myntri sorkar.
U la ong, “Aiba U Blei un ai bor sha ka ïing kaba mad ïa kane ka jingjia bad sngewsih bad ba un ai ka jingjah thait ïa ka mynsiem ba la khlad noh jong u Garg bad ai ba ka nam ka burom jong u kan ïaibteng sha ki pateng ban wan bad khamtam ki riew ieid jingrwai bad jingtem,” u la bynrap.
