Shillong Nailur 22: Ki shipai ka Assam Rifles ha ka sngi Nyngkong ki la ïa burom kaba kyrpang ïa u Nb Sub Shyam Gurung, uba la aiti ïa la ka jingim ha ka por ba shah hiar thma ha Nambol Sabal Leikei, Bishnupur, Manipur ha ka 19 tarik mynta u bnai.
Ha kane ka sngi ka la don ka jingbuh syntiew kaba la pynlong ha Shillong, ha kaba u Lt Gen Vikas Lakhera, AVSM, SM, Director General Assam Rifles, u la buh ïa u syntiew bad kynduh ruh ïa ka ïing ka sem kaba mad ïa kane ka jingjia ba sngewsih, u la ai ka jingsngewlem na ka liang jong baroh kiba shipai kiba don ha ki kyrdan bapher bapher hapoh ka Assam Rifles.
Ïa kane ka prokram la shim bynta da ki dkhot ka ïing ka sem, ki shipai Assam Rifles, bad ki nongshong shnong kiba la lum lang ban ai burom ïa ka jingshlur bad ka jingaiti ha ka kam shakri jong u Gurung na ka bynta ka ri.
Hadien ba la pyndep ïa ka jingleh burom ïa ka met jong u la tep don burom ha jaka sah jong u ha Shillong.
U Gurung u la shah pynïap ha ka jingwan hiar thma kynsan jong ki lehnoh bym lah ban ithuh kiba la hiar thma kynsan ha Manipur kaba hap ha Bishnupur district katba ki dang wan ban ai ka jingïarap ïa ki lanot kiba mad ha ka jingshlei um hapoh Imphal Valley.
Kane ka jingwan hiar thma kynsan ka la pynlong ruh ïa 5 ngut kiwei pat ki shipai ba kin mynsaw.
