Shillong, Nailur 13: Ka State Bharatiya Janata Party (BJP) ka la pynpaw ïa ka jingsngewsih kaba khraw halor ka jingkhlad noh u Myntri Rangbah barim ka jylla u Dr. Donwa Dethwelson (DD) Lapang, uba la ju khot ieit kum u ‘Maheh’.
U (L) Dr Lapang, u la dei uba la ih bha ha ka saiñ pyrthei ha Meghalaya, u la long kum u Myntri Rangbah la kumba 4 samoi naduh ka snem 1992 haduh ka snem 2010 bad hadien pat u la long u nongai buit ba rangbah jong ka sorkar jylla haduh ka snem 2024.
Ka party ka la kheiñ ïa u (L) Dr Lapang kum u riewkhraw ha ka saiñ hima sima, u nongïalam uba ïar ka jingmut, bad u nonghikai uba la aiti ïa la ka jingim ban shakri ïa ki paidbah. Ki jingïohi jngai jong u, kum u nongïalam ka la wanrah ka bynta kaba khraw ban pynwandur ïa ka lawei jong ka jylla, kynthup ka jingthaw ïa ka Ri-Bhoi district. Ka jinglong sngewrit u (L) Dr Lapang, ka jingshida bad ka jinglah ban shim ka rai kaba skhem ka la pynlong ïa baroh ban burom.
U Nongaiktien ka BJP u Bah Mariahom Kharkrang u la ai burom ïa u (L) Dr. Lapang, da kaba ong, “Mynta ka sngi ka jylla Meghalaya ka la duh ïa u riew saiñ pyrthei ki paidbah, u nongïalam uba tbit bad u nonghikai, u kpa bad u jingshai ba ïalam lynti na ka bynta ki pateng ban wan.”
U la ong ba ka party ka duwai na ka bynta ka mynsiem ba un ïoh ka jingjah thait bymjukut bad ai ba kane ka jingnoh synniang jong u kan kyntiew ïa ka bha ka miat jong ka jylla Meghalaya.
