Shillong, Nailur 13: Baroh 288 tylli ki mukotduma ba la lah ban pynbeit, bad na kane ka jingpynbeit la ïoh ban lum ka pisa T. 2,65,82,254 hapoh ka jingshim bishar ka National Lok Adalat ba la pynlong da ka Meghalaya State Legal Services Authority (MSLSA) ha kylleng jong ka High Court bad ha baroh ki district court ha Meghalaya.
Ïa kane ka pynbeit ïa ki mukotduma la pynlong hapoh ka jingïalam jong u Justice H. S. Thangkhiew, Acting Chief Justice jong ka High Court ka Meghalaya bad Executive Chairman ka MSLSA, bad u Justice W. Diengdoh, Judge ka High Court bad Chairperson ka High Court Legal Services Committee.
La don ruh baroh 847 tylli ki mukotduma kiba la shim ban pynbeit, ba kynthup ïa 462 tylli ki mukotduma pre-litigation bad 385 ki mukotduma ba dang sah.
Na kine ki 288 tylli ki mukotduma kiba la dep ban pynbeit da ka jingjop, ka la wanrah ka jingïoh lum ka pisa baroh T. 2,65,82,254.
