Jah rngai ki MLA ka VPP ha ka jingkren ai burom u Dy Speaker ba thymmai ha Assembly

Shillong, Nailur 12: Baroh sawngut ki MLA ka liang pyrshah na ka Voice of the People Party (VPP) ha ka sngi Thohdieng ki la jah rngai na ïingdorbar khlem da shong ne ïa shimbynta ha ka jingkren pdiang burom ïa u Symbud Lamphang (Dy Speaker) ba thymmai ka Ïingdorbar Thawaiñ u Limison D Sangma ha kaba la ïohi ba baroh ki shuki jong ki, ki la thylli lut ha kane ka por.
Kine ki MLA kiba jah rngai ki kynthup ïa u MLA ka Nongkrem u Bah Ardent Miller Basaiawmoit, MLA ka Mawlai u Bah Brightstarwell Marbaniang, MLA ka Mawryngkneng Bah Heavingstone Kharpran bad u MLA ka North Shillong u Bah Adelbert Nongrum.
Haba phai pat sha kawei ka liang baroh ki MLA ka liang pyrshah na Garo Hills ki la shim bynta ha kane ka jingkren pdiang burom ha kaba kane ka pyni ïa ka jingiapra hapoh ka liang pyrshah.
Ka daw ba shalyndet ki MLA ka VPP ban jah rngai ban donlang lang kam long kaba shai, hynrei ka jingleh jong ki, ka la pynlyngngoh ïa ka Ïingdorbar Thaw aiñ.