Ka long kaei kaei pynlyngngoh ïa ki paidbah jong ki 92 tylli ki shnong kiba hap hapoh ka Amlarem Civil Sub Division, West Jaiñtia Hills District, ka thaiñ kaba don markhap bad ka khappud jong ka ri Bangladesh kiba mad ïa ki jingeh ba laiphew jait na ka daw ka jinglip khah khah ka bording.
Ka Amlarem Civil Sub Division ka don ar tylli ki shlem pynmih bording kiba heh, kata, ka Lakroh Mini Hydel Project bad ka Myntdu-Leshka Hydro Electric Project. Hynrei ki paidbah kim ïoh jingmyntoi eiei ruh em namar ka jinglip bording long manla ka khep haba jur tang ka lyer bad haba jur u slap.
Ka jinglip bording ka ktah ïa ka treikam treikam jong ki paidbah kiba pyndonkam ïa ka bording ha kiba bun rukom. Ha kum kane ka juk, ki paidbah ki pyndonkam baroh 24 kynta khlem sangeh ïa ka bording namarba ki im kamai jakpoh ha kiba bun ki jait kam ba ki treikam.
Ka daw na ka jinglip khah khah ka bording ka dei hi na ka daw ka jingbym pat lah ban shna ïa ka Control Room jong ka Meghalaya Energy Corporation Limited kaba la sdang naduh u snem 2017. La phra snem ki la ïaid hynrei ka jingshna ïa ka Control Room ym pat lah ban pyndep pura na ka daw ka jingduna ki nongtrei. Wat ka kompeni kaba shna ïa ka Control Room kam lah satia ban pynbiang ïa ki nongtrei ha kaba ym lah satia ban tip ïa ki daw.
Ki paidbah kiba shaniah ha ka bording ban treikam treikam ki ïakynduh mawsiang namarba jinglip bording ka jia manla ka khep bad kaba kham pynsuhsat ka long ruh wat ïa ki khynnah skul khamtam ha kum kane ka juk ba ha ki skul pule la pyndonkam ïa ki Smart Class bad kumjuh ruh haba ki khynnah pule ki donkam ban pyndep ïa ki lynnong kot bad ki pynkhreh ïa ki eksamin. Ki jingduhnong jong ki paidbah na ka jingbym lip bording khah khah ka jur haduh katta katta.
Ka jingshna jong ka Sorkar ïa ka Lakroh Mini Hydel Project bad ka Myntdu-Leshka Hydro Electric Project ka la pynkmen ïa ki paidbah hynrei phewse ka long pynban markhongpong namarba kine ki ar tylli ki shlem pynmih bording kim shym la ai jingmyntoi eiei ïa ki paidbah ha ka thaiñ Amlarem.
Ka jingbym shimkhia jong ka tnat Bording ka Sorkar Jylla ban tuklar ïa ka jingshah leh meinah jong ki shnong kiba don sha ki thaiñ nongkyndong ka pynlong ïa ki paidbah ban shu kylla sohpdung ei kha ma kha.
Ym tang ha ka thain Amlarem Civil Sub-Division hynrei dang shen wat ki khlieh nongsynshar shnong ka them Ribhoi ki la byrngem wat ban khang tala ïa ka ophis treikam ka MeECL ha Umïam namar ka jinglip khah khah ka bording. Imat katba ki paidbah kim pat khih pat ksar ka sorkar i kumba ka ïohthiah bad ki nongtrei sorkar i kumba kim da kheiñ snep than ïa ka jingeh jong ki paidbah.
Ym lah ban len ba ka pung Umïam kaba don ha them Ribhoi kaba lah ban bsa ïa ka bording ha baroh kawei Sor Shillong pynban kan pynduhnong ïa ka them Ribhoi kaba pynmih ïa ka bording. Kine ki dei ki jingeh kiba ym tang ha ha ka thaiñ Amlarem bad ha ka them Ribhoi hynrei wat ha kiba bun ki shnong nongkyndong, ka jinglip bording ka jur bha bad nalor kata ka jingtlot ka bording ha ka por mynmiet ka long thik tang kumba shu thang da u mombati.
Jin lada ka Sorkar ka kwah ban pynjanai ïa ka jingshari ïa ki paidbah ka ladei ban bthah ïa ki ophisar jong ka MeECL, MePDCL ba kin leit jurip hi dalade ïa ka jingthud ka bording sha ki shnong nongkyndong kaba kim ju poi pyrkhat satia.
Kane ka dei ka bynta kaba ka tnat sam bording ka dei ban khmih khnang ba ki paidbah kiba pyndonkam ïa ka bording kin ym duhnong namar ki dei ma ki, kiba hap ban siew ïa ka bai thang bording shi sien shi bnai wat lada ka bording ka lip ne meh ruh ka MeECL kam map satia wat tang shi tyngka ruh ïa ka bai thang bording. Lada ka long kumne ka jingduhnong ka dei hi ïa ki nongpyndonkam bording ym ïa ka tnat pynmih bording.
