Sha ka NPP poi u MDC shimet, 13tarik yn hiar ki heh NPP sha Rambrai ban pdiang burom

Shillong, Naitung 08 : Ka Natonal People’s Party (NPP) sa tang katto katne sngi kan sa kiew sha ka san ngut ka jingdon ki MDC jong ka party ha KHADC hadien ba uwei na ki MDC shimet u la shim ïa ka rai ban pynïasoh noh sha ka party shen. Ïa une u MDC shimet na Rambrai, Bah Lurshai Kharbani yn pdiang sngewbha da ki heh ka NPP ha ka jingïalang kaban long ha kane ka sngi Saitjaiñ, ka 13tarik mynta u bnai ha ka por 11baje ha Vann Hall Nongkroh, Rambrai.
Katkum ka jingïathuh da u Working President ka Party, Bah Hamlet Dohling la ïathuh ruh ba ïa une u MDC shimet yn pdiang burom da u State President ka party, Bah Prestone Tynsong ba dei ruh u Symbud Myntri Rangbah ka Jylla nalor kiwei kiwei ki nongïalam ba hakhmat ka party.
La ïathuh ba ha kane ka sngi ka party kan pdiang burom lang ruh ïa ki nongïalam ba hakhmat jong u Bah Lurshai.
Kumban shu pynkynmaw, ka NPP ha u bnai ba la dep ka la pynduh noh shwa ïa ka bor treikam jong ka NPP Rambrai bad la khmih lynti da ka jingwan pynïasoh jong u Bah Lurshai Kharbani yn sa pynthymmai biang ïaka jingtreikam jong ka party ha katei ka constituency.
Kumba long mynta, ka party ka don tang sawngut ki MDC ha KHADC ba kynthup ïa ka Kong Grace Khapuri na Nongshken, Bah Alvin Sawkmie na Mawsynram, Bah Sosthenes Sohtun na Jirang bad Kong Rona Khymdeit na Nongpoh.
Na ki tyllong khubor ba la ïoh lum la ïoh jingtip ruh ba kane ka dang dei tang ka jingsdang watla ki la don katto katne kiwei pat ki MDC kiba la ai ksai bad pynpaw ïa ki dak ki shin ba ki kwah ban kynthih lang noh sha ka sem NPP.