Kyrpad u Myntri ïa ka AKMTA ban ïakren shwa bad ka kynhun na Assam ha shwa ban rai khang ïa ki kali

Shillong, Nailur 08: U Myntri ka tnat jngohkai pyrthei ka jylla u Bah Paul Lyngdoh u la kyrpad ïa ka All Khasi Meghalaya Tourist Taxi Association (AKMTA) ba kan ïakren shuwa bad ka kynhun na Assam ha shwa ba kan ïaid shakhmat bad ka rai ban khang ïa ki kali tourist kiba nabar ban leit sha ki jaka jngohkai kiba don ha Meghalaya.
Kane ka la mih shi sngi hadien ba ka Tourist Transporter Association of Assam (TTAA) ka la byrngem ba ka United Body of the Transporters ka Assam ka lah ban pynsangeh lut ïa ka jingkamai kali sha ka jylla Meghalaya lada ka AKMTA ka khang ïa ki kali na Assam ban leit sha ki jaka jngohkai kiba don ha Meghalaya.
Halor kane haba ïakren bad ki lad pathai khubor ha ka sngi Nyngkong, u Bah Paul haba kdew ïa ka jingpynpaw jong ka TTAA ula ong, “Kane ka long thik ïa kaei kaba nga lah dep ban maham ha ki por kiba la dep ba kano kano ka jingleh ka jong ngi kan don beit ka jingshah pynphai kylla. Ngi im ha ka pyrthei kaba ngi hap ban ïa shaniah mar kylliang”.
U la ong, “Ngi lah ïakren bad kine kiba don bynta kynthup ïa ki kynhun jong ki nongñiah kali bad sa shisien, ngi khot bad kyntu ïa ki ba kin sngewbha ban ïakren bad ki kynhun kiba na Assam.”
U la bynrap, “Mynta haba phi don ïa kino kino ki mat kiba ïadei hapdeng ka jylla Meghalaya bad ki jylla kiba marjan, la shim ba kan long kaba biang bha lada phi ïakren bad kiba na kawei ka jylla ruh. Lada ka KSU ka don ïa kano kano ka mat ha Assam, ka ïakren bad ka ASU kumta ngi khmih lynti ba kitei ki kynhun ruh kin ïakren bad ki kynhun kiba na Assam kiba ïadei lang ha ka juh ka kam khaïi pateng”.
Haba kylli la katei ka jingthmu ban khang pyrshah (ban) kadei kaba be-aiñ, “Kawei ka long la ki don ïa ka national permit ne ka permit ban kamai ha ki 3 tylli ki jylla ne palat, kiba bun hi ki don ïa ka national permit ne ka permits kaba kynthup ïa ka Assam, Meghalaya bad Arunachal Pradesh. Kum ki nongpathai khubor, nga kwah ban pynshlur ban wad ïa ka jingshisha ban lap la kitei ki seng kidei kiba la dep rejistar bad ki don ïa la ka jaka treikam. Hato ki don ne em ïa ka ophis treikam? Ka long ruh kaba kongsan ïa ki ban rejistar ïalade ha ka tnad Transport. Hato kila pyndep ïa katei?.
Ula ong ruh ïa ka AKMTA, “Mynta shwa ba phin dawa eiei na ka sorkar jylla, la kumno kumno dei ban bud ryntih ïa ki katto katne ki bynta kiba donkam katkum ka aiñ jong ka jylla.
U Myntri ula pynshai ba ka jinglong jingman hapdeng ka Sikkim bad ka Meghalaya ka ïapher namar ka jinglong jingman jong ki jaka kum ka Transit State ha kaba bun tylli ki kali ki hap ban ïaid lyngba ka Meghalaya bad ki nongjngohkai ki ju wan ruh sha ka jylla. U la kdew ba ka Sikkim kadei ka jylla kaba kut, kaba don ïa kiwei pat ki bynta.
“Ka Meghalaya ka dei ka ‘transit state’, kaba mut ba kiba bun ki kali kiba lyngba ka Meghalaya bad shisien ba ka la dei ka transit point, ka mut kam long kaba kongsan ïa kata ka kali ban pynkut ïa ka leit ka wan ka jong ka hapoh ka jylla Meghalaya. Ki don ruh ki nongjngohkai kiba leit sha kylleng ki thaiñ shatei lammihngi, kiba mih na Kaziranga sha Shillong ban leit sha Sohra bad nangne ban leit sha Silchar. Kumta kine ki nongleit nongwan kiba leit na kawei ka jylla sha kawei pat,” ula ong.
Ula bynrap da kaba ong, “Kane ka jingpyrshang kan ïalam bakla da kaba ong ba la khang pyrshah ïa ki tourist taxi kiba nabar ban leit sha Sikkim bad phi lah ban wad hi dalade ba bun ki kali kiba na West Bengal ha ka jingshisha ki la leit ïalam ïa ki nongjngohkai sha Sikkim.”
Ha kaba ïadei bad ka jingkynnoh ba bun ki nongñiah kali kila leit ban aiti noh ïa ki kali PRIME, namar ka jingbym lah ban siew ïa ka ram, u Myntri ula ong, “Mano mano ruh ki lah ban pynmih ïa kano kano ka jingkynnoh hynrei katba ngi dang ïakren, ka don ka jingduna jong ki kali kiba kit bad ïalam ïa ki nongjngohkai sha ki jaka jngohkai ki bapher bapher.
U la ong, “Mynta ka jubab kaba suk bha, kaba nga lah ban ai ïa ka Association lyngba ka jong phi bad ïa ka kynhun ka long ba phim dei ban klet ba phi don ïa ki kabu kiba biang bha kum ki trai shnong. Shisien ba phi dei u trai shnong, kaei ka jingeh ban pynïadei bad ki homestay, resort, hotel. Ïakren bad ki, ïatreilang bad ong ïa ki ba don 6 tylli ki kamra bad ha kano kano ka por ba phi don ïa ki nongwankai, ngin wan ïalam ma ngi ïa ki sha ka homestay jong phi bad ha kawei pat ka liang, phi lah ban pyndonkam ïa ngi ba ngin ïalam ïa ki sha ki jaka jngohkai. Kan don jingeh aïu ban leh ïa katei. Kadei ka lad kaba suk tam ban pynbeit kaba nga lah ban ai. Phi shu kit ïa ki nongleit nongwan na Guwahati, na Airport ne na Train station, don ïa ka jingïateh kular bad ki briew kiba pynïaid ïa ki homestay, ong ïa ki ba phin wan ïalam ïa ki briew ban sah bad na ka liang ka jong ki pat kidei ban pyndonkam ïa ka jingshakri ka jong ki ban kit ne ïalam ha kylleng ka jylla Meghalaya. Kaei ka jingeh ban leh ïa ka tei? Balei ba ka sorkar kan leh ïa katei na ka bynta ka jong ki? ula ong shuh shuh.
Ha kaba ïadei bad kane na ka liang u Commissioner & Secretary uba khmih ïa ka kam jngohkai u Bah Cyril Diengdoh ula ong ba ka tnad ka la lum la bunsien ïa ka jingïalang bad ka AKMTA bad ka dang wad ïa ki lad ki lynti kiba biang tam.
U la ïathuh ba kawei na ki lad kaba ki la shimkhia kadei ban pynduna noh ïa ka jingshim ïa ka bai pynïeng kali jong ki kali na Meghalaya ha Guwahati Airport bad kane kan ïarap ïa ki.
U Bah Diengdoh ula pynshai ruh ba yn sa pynheh bad pynïar ïa ka Shillong Airport, kane kan kyntiew ïa ka jingwan beit ki nongjngohkai sha ka jylla bad kane kan kyntiew ïa ka kam jngohkai. Ïa kane la khmih lynti ba kan wanrah shuh shuh ïa ki nongjngohkai sha ka jylla ka ban ai jingmytnoi ïa ka ïoh ka kot jong ka jylla.
U Commissioner u la banjur halor ka jingïar jong kane ka mat, ka ban kynthup ïa baroh kiba don bynta lang ha ka kam naduh ki trai jong ki homestay bad ki kynhun na ka jylla. U la banjur ïa ka jingdonkam ban long kiba phikir bad ban ïadonbynta bad baroh ki kynhun ban wad ïa ka lad kaban long kaba biang bad kaba long hapoh jong ka aiñ.
U Bah Diengdoh ula maham ba kano kano ka rai kaba shim khlem da pyrkhat bha ka lah ban pynmih ïa ka jingeh kaba khraw kynthup ïa ka jingshah mudui sha ka Ïingkashari. Ula banjur ïa ka jingdonkam ban don ïa ka jingpynbeit ka ban ryntih na ka bynta baroh kiba donbynta lang ha ka kam bad ka pynthikna ban bud ryntih ïa ki kyndon aiñ.
U la ong, “Ki la don kiei kiei kiba ngi lah shimkhia, kam dei ba ngi lah kyntait ïa ki mat jingdawa. Kano kano kaba hap hapoh u pud u sam kaba lah ban leh, ngi kyrmen skhem ba ngin lah ban pyntreikam ïa ki hynrei kane ka donkam shwa ban pyndon bynta lang ïa baroh bad ban khmih bniah bha namar ba kadei ka mat kaba lah ban shah ktah kylla ïa ngi ha ka rukom kaba jur bha namar ba ki paidbah ka Meghalaya ki leit sumar sha Guwahati, Airport ne Railway station.”
“Kumta ngi hap ban peit ha baroh ki liang, hashwa ba ngin shim ïa kano kano ka rai bad kano kano ka rai kadei ban ïaid katkum ka aiñ, ka hap ban long kaba shong aiñ namar lada ngi shim ïa kano kano ka rai ka bym biang bad kaba lah ban pynphai kylla da kiwei pat, ki lah ban leit mudui pyrshah ha ka Ïingkashari kumta ngi hap ban long kiba pyrkhat bha,” ula ong.