Bah pyrshah ïa ka ktem shipai ha Photmula shah khot hajir ki nongïalam KSU ha ki Pulit
Mawkyrwat, ‘Nailur, 07: Ki nongïalam jong ka Khasi Students’ Union (KSU), South West Khasi Hills District ha ka sngi saitjaiñ ki la leit synran ïa u President ka seng u Bah Forwardman Nongrem sha Mawkyrwat Police Station halor ka jingshah khot hajir ban ai jubab ïa ka jingshah ujor ha u Syiem ka Hima Maharam u Pa’iem Niandro Syiemiong bad ïa kiwei pat ki nongïalam sengbhalang.
Kane ka jingshah khot ne jingujor ka la jia tang namar ka jingïakhih jong ka Khasi Students’ Union (KSU) bad kiwei ki sengbhalang pyrshah ïa ka jingthmu ban ai jaka ïa ki shipai BSF ha Photmula wat hadien ka jingai por ban weng noh ïa kane ka jingthmu pynban u Syiem um shym la patiaw satia.
Halor kane ka jingshah khot hajir, la synran lang ruh naduh ki nongïalam jong ka Durbar Raid Sawsymper, ki dkhot ka Khasi Students’ Union (KSU), ka Hynñiewtrep Achick National Movement (HANM) South West Khasi Hills District, ka Hynñiewtrep Integrated Territorial Organisation (HITO) South West Khasi Hills District bad kiwei ki Sengbhalang.
Ha kaba ïadei bad kane ka jingshah khot, u Bah Forwardman Nongrem u la ujor kylla pyrshah ïa u Syiem ka Hima Maharam da kaba ong ba ka KSU bad kiwei ki sengbhalang kim shym la leh be-aiñ, hynrei ki la pyrshah da ka lynti kaba jai jai halor ka nongrim jong u paidbah.
U la kdew ruh ba ka jingujor pyrshah da u Syiem ka Hima Maharam ka long ka jingkynnoh khlem nongrim bad khlem jingpynshisha, tang na ka bynta ban pynsngapjar ïa ki sengbhalang bad ban pynwit ïa ki paidbah kiba kren pyrshah ïa ka jingthmu jong u kum u Syiem.
Ha ka jingïakren bad ki lad pathai khubor, u la pynpaw ruh ba kane ka jingpyndonkam bakla ïa ka aiñ ban ujor ïa ki nongïalam sengbhalang ka dei ka kam kaba sniew bad ki bor Pulit ki dei ban shimkhia bad tohkit halor kane.
“Watla ki nongïalam ki la shah kynnoh bad shah pynngat kyndon hynrei ka KSU ka la rai ba kan bteng ïa ka jingïakhih tad haduh ba u Syiem ka Hima Maharam un lum ïa ka Dorbar Hima bad pynbna paidbah ba la weng noh ïa ka jingthmu ai jaka sha ki shipai BSF ha Photmula”, ong u Bah Forwardman.