Shillong, Rymphang, 20: Watla ka elekshon jied nongmihkhmat sha ka Ïingdorbar Thawaiñ ka Jylla Meghalaya ka dang sah sa shi snem tam eiei hynrei ka saiñpyrthei ka la khih phaloh bha ha ki katto katne tylli ki Constituency.
Ka Hill State People’s Democratic Party (HSPDP), ka seng saiñpyrthei ba la rim bha ha kane ka Jylla Meghalaya kaba don ar ngut ki MLA ha kane ka samoi ba mynta, ka la pynkhreh ban ïaid shakhmat ban knieh biang khamtam ïa ki Constituency kiba don ha West Khasi Hills District.
Halor ka Mawthadraishan Constituency, u President jong ka HSPDP u Bah KP Pangniang, u la ong ba u samla Shakliar Warjri u la ïaid shakhmat ban ïeng ïakhun kum u kyrtong na ka Party watla ym pat la pynskhem pura ïa u kum u kyrtong.
“Hynrei kum ka Party hi ka don ïa ka jingthmu ban ailad ïa ki samla kiba la shemphang bad biang bha ha jingnang jingstad”, la ong u bah KP Pangniang bad bynrap, “ngi donkam ïa ki samla ha kane ka elekshon ban wan ban kit ban bah ïa ka Ri bad Jaidbynriew.’
Haba kylli namarba ka UDP bad HSPDP ki ïatreilang ha ka Regional Democratic Alliance (RDA) bad na Mawthadraishan kan hap ïakhun pyrshah ïa u Bah H Brolding Nongsiej, uba dei u MLA ba mynta na ka UDP bad uba long ruh u Myntri ha ka Sorkar MDA, u Bah Pangniang u la ong ba kam pher ïa kata namarba kan dei beit ha ki Constituency kiba hap ïakhun pat da kine ar tylli ki Party ym da kiwei pat.
“Ngi don ka jingïasngewthuh jingmut hapdeng jong ngi ki seng saiñpyrthei riewlum namar ngi kwah ba kata ka jingsngew ba dei ïa la ki jong kan ngam ha dohnud watla ki don ki Constituency kiba ka jingïakhun ka dei beit hapdeng ka UDP bad HSPDP ym da kiwei pat ki seng saiñpyrthei”, u la ong.