Nongstoiñ, Nalur 04: Ki khubor kiba jan bha bad ki kam saiñ pyrthei la ong ba u bah R.G.Momin MLA shimet na ka Rambrai Jyrngam, u lah ban leit rung noh sha ka National Peoples Party kaba ïalam mynta ïa ka sorkar ka Meghalaya Democratic Alliance II.
Kane ka khubor ka la pur sted bha haman la ki shnong ki thaw jong ka constituency baroh kawei, ha kaba bun ki riew rangbah na ki shnong bapher bapher hapoh ka constituency, haba ïakren ïa khana ki poi beit sha katei ka phang ba utei u MLA shimet un sa rung noh ha ka NPP.
Haba pyrshang ban wad jingtip bniah halor katei ka khubor ym pat lah satia ban ïoh, hynrei ki don pat ki riew rangbah kiba ong ba ki nongïalam ba hakhlieh duh jong ka NPP kin wan ha Rambrai ha ka 13 tarik mynta u bnai, ban pdiang burom ïa u bah Momin sha ka party.
Ki don ruh ki riew rangbah kiba dei ki nongïalam jong kiwei pat ki seng saiñ pyrthei, kiba ong ba lada u bah Momin u rung sha ka NPP ha ka Election MLA ka ban sa long ha u snem 2028.
Kiwei pat ki seng saiñ pyrthei kim don jingmut shuh ban dang ïaleh Election na Rambrai Jyrngam constituency, namar ba ki nongthep vote ki ba dei ki Garo ki la poi sha ka khatphra hajar ngut bad ki nongthep vote Khasi pat ki lah ban kiew tang haduh arphew wei hajar ngut.
Ki la ong ruh ba ki kyrtong na ki seng saiñ pyrthei na Khasi kiba don ïa ki vote bank ha ka Rambrai Jyrngam constituency ki dei HSPDP, Congress bad ka NPP bad lada u bah Momin un rung noh sha ka NPP u bah Kimfa S Marbañiang un ym ïoh tiket shuh ban ïaleh Election MLA.
Ha kajuh ka por ki la ong ba ka jingdon jong ka VPP ka dei ka kabu ksiar ïa u bah Momin, ba un jop da kaba suk sa shisien pat kum u MLA na katei ka constituency bad wat lada ka Congress bad HSPDP bad ki nongkyrshan jong u bah Kimfa Marbañiang kin ïatylli lang kawei ruh, kin ym jop satia namar ki paitbah Garo te kin ym thep satia ïa ka VPP, hynrei kan long pat ka nongpynpra ïa ki paitbah nongthep vote kiba dei na ki shnong Khasi.
Ha kaba ïadei bad ka MLA Election ha u snem 2028, ki riew rangbah ki la ong ba ym lah ban len ba ha Rambrai Jyrngam constituency ka la long kaba eh haduh katta katta, ba ki Khasi kin dang jop Election namar kat nang slem ka jingdon jong ki paitbah Garo kiba thep vote ka nang kiew bad ka jingïa bishni para Khasi ruh ka nang khraw.
Ha kajuh ka por ki la ong ruh ba wat na ka liang ki paitbah ruh kim sngewthuh satia ïa ka hok kum ki nongthep vote bad kumba ka long baroh shi katta, kino kino ki nongmihkhmat lada kim dei kiba biang pisa ha shuwa ka por Election kin ym jop satia.
