Nongstoiñ, Nailur 04: Ka District Magistrate Eastern West Khasi Hills Mairang, ka la pynjari ïa ka Kyndon Aiñ 163 BNSS 2023, ban buh ïaka jingpyrkhing bad khang pyrshah ban pynlong ïa ka jingai khwai dohkha bad ka jingpynkhalai nusip (lucky draw) ha ki jaka kiba don harud u surok bah NH44 E, kiba ka jingjngai jong ka pung ne ka jaka na u surok bah, ka long tang hapoh ka 1 Kilometer.
La pynmih ïa kane ka hukum, hadien ka jingïoh jingtip ha kaba dei bad ka jingjur jong ka jingdheng kali kaba la neh da ki lai saw kynta ha ki thaiñ Kynshi-Mawlangren, ha ka 27 tarik 2025 na ka daw jong ka jingïalum briew ha ka jingïakop khwai bad lucky draw kaba la pynlong ha katei ka jaka, kaba la wanrah ïa ka jingkhapngiah ka surok NH44 E, kat haduh ba ka la wanrah ïa ka jingdheng kali kaba jur. Kane ka la pynthut ïa ka ïaid ka ieng jong ki paidbah nongleit nongwan.
Ha kaba ïadei bad kane ka jingpynmih hukum, lada don kino kino ki bym sngew ïahap ne sngew pyrshah ki lah ban leit ïakynduh ïa ki bor ba dei khmih.
