Thalaiñ tyngeh ki nongïalam ka HANM ïa ki nongmihkhmat ka jylla bad karkhana dewbilat

Khliehriat, Jylliew 28 : Ki nongialam jong ka Hynñiewtrep Achik National Movement ha ka jingialang ba la pynlong mynta ka taiew ha ophis treikam jong ka seng ha Dkhiah West, ki la thalaiñ tyngeh ïa ki nongmihkhmat jong ka jylla ki bym don ïa ka jingktkhlieh na ka bynta ka jingbit jingbiang ki paidbah khasi bad pnar bad kumjuh ruh ki nongialam ka seng ki la thalaiñ tyngeh ïa ki karkhana dewbilat kiba don ha East Jaiñtia Hills District bad kynnoh ba ki la shu wan leh mon shane bad kjit ïa ka spah jong ka jaitbynriew.
U President rangbah jong ka HANM Central Body, u bah Lamphrang Kharbani, u kyntu ïa ki dkhot ba ki dei ban bud dien bad wad bniah bha ïa ka rukom thungkam thungjam ki karkhana dewbilat kiba don ha East Jaiñtia Hills District bad ong ba ki ki dei ban thep kam shwa ïa ki trai shnong jong ka thaiñ, lait noh satang kito ki kam ki bym lah ban trei ki trai shnong ïa kita ka seng kam mushlia lada ki wanrah briew na shabar ka district ruh, u la ban jur ïa ka jingleh ka company Star Cement bad ong ba “Namar lada kam lah ban aikam ïa ki trai shnong jong ka thaiñ, kam don jingmut ba ka Star Cement kan wan kamai spah bad la dei ban shu beh bad kyndang noh, ym dei ban ailad namar lada ailad kan sa long ka jingshah tim ha ki longdien” shuh shuh u la bynrap ruh “Wat ka jylla Assam ka bym ai eiei ïa ka company, hynrei ka Star Cement ka la ai jingiarap haduh T1. klur tyngka, kumta halor kane ka mat ka seng ka dei ban shim khia ban wad jingtip bha namar phi kum ki nongshong shnong jong ka East Jaiñtia Hills District phi hap buh jingkylli ïa ka Star Cement ba lada ka lah ban ai T1 klur tyngka ïa ka Assam, katno spah klur tyngka ka la ai ïa ka East Jaiñtia Hills District, namar lada phim kren eiei ïa kane ka jingleh ka Star Cement, kiwei kiwei ki karkhana dewbilat ruh kiba don hapoh ak district kin leh kumjuh bad kin nym kheiñ snep, kim nym burom ïa phi ki trai jaka” ong u bah Lamphrang K.Bani.
Kumjuh ruh utei u nongialam u la kren sngewkhia haduh katta katta ïa ka jingleh bym salia ki nongmihkhmat kiba dei ki khasi bad ki pnar, ki bym shim khia lem ban iakren halor ka mat kaba ïadei bad ka bhah thungkam thung jam jong ka sorkar kaba la iapher haduh katta katta hapdeng ka bhah ïa u Garo bad ïa ki khasi/pnar bad ong “Namar katkum ka hukum ba mih na ka iïngbishar ka paw ba ki kham ioh bhah buh ki Garo ban ïa ki khasi bad Jaintia, kane ka pyni shai dkhar ïa ka jingbym ler ki 36 ngut ki nongmihkhmat kiba dei ki khasi bad Jaiñtia bad kane ka paw ruh ba ki kham shemphang ki 24 ngut ki nongmihkhmat kiba dei ki jaitbynriew Garo”
Kumjuh ruh, u President HANM Jaiñtia Hills, u bah Shaniah Suchen, u la kyntu ïa ki para dkhot bad ong “ïeng tylli kawei na ka bynta ka jaitbynriew namar lada ngi shaniah ha kine ki nongmihkhmat, kine ki dei tang ki nongdie ri, namar ngi la iohi ba ki karkhana dewbilat kiba don hangne ki la dap sa tang da u bar jylla, ha ka jingshisha ki samla jongngi kim dei ban duh kam, ka sorkar ka la dei ban pynbor ïa kine ki karkhana dewbilat bad bthah ba kawei kawei ka karkhana ka dei ban ai kam haduh shispah ngut ki samla ka thaiñ bad kane kan iarap ban weng ïa ka jingeh ki paidbah ha ka iohkam iohjam”
Haba kren halorka Roster system, u bah Suchen, u kyntu jur ba ym dei ban shaniah ha kine ki blei san snem namar kine tang ba lah biang ka malade kim salia lada kynduh jingeh ki paidbah “Ngi la long ki mraw jong ki nongmihkhmat, kumta lada ngi ailad ïa kum kane kan sa poi ka por ba ha kane ka ri jong ngi kan sa wan dap da ki Garo suda namar baroh shi katto ngi iohi ba u Hamlet Dohling, ha ka por ba u dang long u General Secretary jong ka KSU u la ong ba ka sorkar ka dei ban leh ïa kine kiei ke ei baroh, hynrei mynta u la long long kum u myntri sorkar, nga kwah ban pan jingshai hato balei ma u um lah ban pan jingshai ha ka por ba ki shna ïa kato ka bhah thungkam, ka Roster System, ïa kiwei kiwei ki MLA ngam lah ban shaniah tangba ïa u bah Hamlet Dohlinh nga sngew shaniah bad ngeit ba u long uba tbit ban peit bniah ïa ki kyndon kiba don ha ka thup thungkam thungjam, nga kren ïa kane namar kane ka long ka jingduh nong kaba khraw haduh katta katta ïa ngi ki khasi bad Jaiñtia, wat khmih lynti ïa ka iohkam iohjam katba kane ka Roster system ka dang longsah kumne namar baroh ki kam yn dap lut sa tang da ki Garo”
Ha kajuh ka por, u bah Shaniah, u la ai ka jingkitbok kitrwiang ïa ki nongialam bad ki dkhot jong ka HANM East Jaiñtia Hills District kiba la suid la shor, kiba la jied bad pynskhem ha kane ka sngi bad ai mynisem ïa ki ba kin treibha bad trei hok ïa ka kam na ka bynta ban kyntiew ïa ka ri bad ka jaitbynriew.
U President jong ka HANM Narpuh Circle, u bah Pyndap Syiemlieh, u la pynpaw ka jingsngew khia halor ka jing bun ki mynder bad bar jylla ha ka thaiñ Narpuh bad ong ruh ba ki nongmihkhmat kim iohi shuh ïa kane ka jing ima kaba ap ïa ka ri bad ka jaitbynriew, u la kyntu ïa ki para nongialam bad ki dkot ban trei ïa ka kam da ka mynsiem ban aiti lut na ka bynta ka ri bad ka jaitbynriew.
Ha kane ka jingialang u President rangbah u bah Lamphrang Kharbani, u la pynskhem ruh ïa ki nongkitkam bad ki dkhot ba thymmai jong ka HANM East Jaiñtia Hills District kiba kynthup u president, u bah Hasrealme Ryngkhlem, Vice President, u Mihsalan Thoo, General Secretary u bah, Speling Dkhar, Assistant Secretary, u bah Bamilang Ryngkhlem, Publicity Secretary, u bah Vicky Phawa, Organising Secretary u bah Firstborn Phawa, Finance Secretary, u bah Pynhun Bareh bad kiwei kiwei.
Kiba la ai jingkren ki kynthup ruh u Adhcok President HANM, Eastern West Khasi Hills, u bah Artist Ryntathiang.