Tura, Jylliew 28 : Ka ophis u District Sports Officer, West Garo Hills Tura ha ka sngi Ba-ar ka la pynhap pyrda noh ïa ka lympung District Level Inter School Subroto Murkherjee Football Tournament kaba la pynlong ha madan Chandmary, Tura.
Ha ka jingïakhun ha ka thup kiba hapoh 14 snem, ka Government Boys Higher Secondary School, Tura ka la ïoh ban rah ïa ka nam lahduh katba ka Christian Boys Secondary School, Tura ka la wan ha ka kyrdan kaba ar.
Ïa ka khusnam rang ap kol ba kynsai tam la ïoh ban khur da u Heart Sangma jong ka GBHSS, nangta ïa ka khusnam ba ïoh thep bun kol eh pat la ïoh da u Jenjima jong ka CBSS bad u Akim A Sangma jong ka GBHSS pat u la ïoh ïa ka khusnam kum u rangïalehkai ba kynsai tam.
Ha ka lympung jong kiba hapoh 17snem pat, ka Don Bosco Higher Secondary School, Tura ka la ïoh ban rah ïa ka nam lahduh hadien ba ka la lah ban pynliem noh ïa ka Rongkhon ha ka phainal. Ïa ka khusnam rangap kol ba tbit la ïoh da u Raian D Sangma, bud sa u Manrak S Sangma kum u rangïalehkai ba ïoh thep kol bun eh katba u Smart R Marak pat u la ïoh ïa ka nam kum u rangïalehkai ba kynsai tam. Kine baroh lai ngut ki dei na ka Rongkhon Secondary School.
Ha ka thup ki kynthei ba hapoh 17 snem pat ïa ka nam lahduh la ïoh da ka Monfort Dilne Bolchugre hadien ba ka la ïoh ban pynliem noh ïa ka Rongkhon Secondary School. Ïa ka khusnam nongap kol ba tbit la ïoh da ka Hellina Ch Marak, nangta ka Gipanchi Ch Marak kum ka nongïalehkai ba ïoh thep bun kol eh katba ka Silrime M Sangma ka la ïoh ïa ka khusnam rangïalehkai ba kynsai tam. Kitei baroh ki dei na ka Monfort Dilne Bolchugre School.
Kaba kham pyn-shongshit eh ha katei ka lympung ïalehkai kadei ka jingïakob tan tyllai hapdeng ki kynthei kumjuh ha ka liang ki shynrang. Ïa ka nam lahduh ha ka liang ki shynrang la ïoh da ka Wadanang Secondary School hadien ba ka la pynliem noh ïa ka Government Higher Secondary School katba ha ka liang ki kynthei pat ka Government Higher Secondary School ka la pynliem noh ïa ka Wadanang Secondary School.
Ïa katei ka lympung ïalehkai la pynhap pyrda da u Deputy Commissioner ka District, u Swapnil Tembe kum u Kongsan nalor ki ophisar jong ki tnad bapher bapher.
