Shillong, Nailur, 03: Ka tnat shipai Border Security Force (BSF), kaba ap pahara ha khappud, ka la sdang ïa ka jingpdiang ïa ki phorm ba la thep da ki samla na ka bynta ka kam Constable (General Duty) tang na ka bynta ki samla trai muluk ka jylla Meghalaya.
Ha ka jingthep phorm ha BSF Frontier, Headquarter Shillong, la pynlong ha ki ar jaka, kata ha BSF Campus, 200 Bn Dhanakgiri, Tura bad ha SHQ BSF Mawpat, Campus Shillong.
Naduh ka sngi banyngkong, la sakhi ïa ka jingpoi bun bah ki samla shynrang bad kynthei ban thep ïa ki phorm, kaba pyni ruh ïa ka jingkmen jong ki samla ka jylla Meghalaya ban shakri ïa ka ri na ka bynta ban ïada ïa ka khappud.
Ha ka sngi Balang ha nongbah Shillong la sakhi biang ïa ka jingwan thep phorm kaba kham bun shuh shuh ha kaba ki samla naduh ki shnong kiba jngai ki la mih dang step na la iing ban ieng ha u laiñ uba jrong da ki phew kynta tang ban ïoh thep ïa ka phorm.
Kiba bun ki samla ha ka jingïakren bad u nongthoh khubor ki la ong ba ka jingwan thep ïa ka kam ha ka tnat shipai BSF ka long namarba ki angnud ban ïohkam khamtam ha kum kane ka juk ban ïoh kam ka long kaba eh haduh katta katta.
Kum ban shu pyntip ba ka tnat shipai BSF ka la pynbna ïa ka jinglait kam kaba 300 ngut na ka bynta ka post Constable (General Duty).
