Nongstoiñ, Nailur 03: Ki nongïalam ba ha khmat jong ka Assam Meghalaya Joint Protection Committee jong ki sanphew wei tylli ki shnong, ba kynthup ïa ki shnong Khasi, Garo, Rabha bad Boro kiba don ha ka thaiñ Kyrshai, ha ka sngi nyngkong ki la pynlong ïa ka jingïakynduh lang na ka bynta ban ïatai halor ka jingthmu jong ka sorkar Assam, ban pyntrei biang ïa ka Kulsi Project da kaba den ïa ka wah Khri na ka bynta ban pynmih bording.
Ha katei ka jingïakynduh lang jong ki kaba la pynlong ha ka shnong Kyrshai, ki la khot lang ruh ïa u bah K.P.Pangñiang MLA barim ka Rambrai Jyrngam, namar ba naduh ka por ba u dang long kum u MDC, ma u ryngkat bad u (L) Maieit Hopingstone Lyngdoh, ki la ïeng skhem bad pyneh hi triang ban kim shah da lei lei ba ka sorkar Assam kan den ïa ka wah Khri. Namar ki saw tylli ki shnong Khasi ka Kyrshai, Darephang, Nonspung bad Umbah bad ki sawphew hynriew tylli ki shnong ba kynthup ïa ki shnong ba shong da ki Garo, Rabha bad Boro kin shah ktah.
Kum ban pynkynmaw ba ha ka 11 tarik u bnai Naitung ba la dep, da ki spah ngut ki paitbah na kitei ki sanphew wei tylli ki shnong ki la wan ban ïakynduh ïa u bah Garod L.S.N Dykes IAS Deputy Commissioner ka West Khasi Hills, ban kyrpad ïa u ba un pynsngew sha ka sorkar ba kan pynsangeh noh shisyndon ïa ka jingthmu jong ka sorkar Assam ban den ïa ka wah Khri.
Dei hadien ka jingwan ïakynduh ïa u Deputy Commissioner ba ki paitbah jong kitei ki shnong ki la kyntu ïa ki nongïalam jong ka AMJPC, ba kin wad jingtip bniah la ka sorkar Assam bad ka sorkar Meghalaya, ki la pynkut noh ne em ïa ka jingïakren halor ka phang ban pyntrei ïa ka Kulsi Project kumba ki la ïakut ha ka por ba ki ïakynduh lang ha Dispur.
Ha kaba ïadei bad ka jingïakynduh lang jong ki nongïalam ka AMJPC ha ka lah sngi u Blei ha Kyrshai, la ai jingkren da u Moniram Rabha president ka All Rabha Student Union Kamrup District, katba na ka liang ki Khasi pat la ïoh ban ïakren bad u bah Albert Nonglang president ka AMJPC u ba na ka liang ki Khasi, na ka liang ki Boro pat la ïoh ban ïakren bad u Rajani Boro, u nongïalam ba hakhmat eh jong ki paitbah nongshong shnong jong ki Boro.
La ong ba ha kaba ïadei bad ka jingkwah jong ki paitbah na ki sanphew wei tylli ki shnong, ka jingïalang ka la ïakut ban pan jingshai na ki ar tylli ki sorkar bad na ki ar ngut ki Myntri Rangbah, ban dawa ba ki dei ban pynshai sha ki paitbah la ki la pynkut ne ki dang don jingthmu ban ïakren halor katei ka mat.
Kitei ki rangbah ki la ong ruh ba lada ka sorkar Assam bad ka sorkar Meghalaya ki kwah ïa ka shongsuk shong saiñ, ki dei ban pynshai kham kloi khnang ba ki paitbah kin suk ka mynsiem.
Ki la ong ruh ba lada kim pynkut noh ïa katei ka jingthmu katei ka kynhun kan skhot biang ïa ka jingïalang jong baroh ki kynhun kiba kyrshan ïa katei ka mat ban pyrshah ban den ïa ka wah Khri.
Shuh shuh ki la ong ba ki kynhun kiba pyrshah jur ïa katei ka project ki long ka FKJGP, KSU, na Meghalaya bad na Assam pat ki long ka All Assam Student Union, All Rabha Student Union, Boro Student Union, Garo Student Union Kamrup district zone, Garo National Council Kamrup district, All Rabha National Council Kamrup district zone, Garo Women Council Kamrup district zone, Sixth Schedule Demand Committee Kamrup district, All Assam Bengalee Youth Student Federation Kamrup District Committee, All Rabha Sahitya Sabha Kamrup district, All Assam Gorkha Student Union Kamrup district, All Assam Koch Rajbanshi Student Union Kamrup district, All Assam Student Union Chaygaon Anchalik Committee, All Assam Trible Sangha Bogaigaon Anchalik Committee, Khilanjiya Adhikar Sangram Samiti Assam, Amata Unnayan Committee, Christian Forum Kamrup District Committee bad kiwei kiwei. Lada ka jingpyntrei ïa katei ka project kam sangeh noh shisyndon ka lah ban wanrah ïa ka jingbym shong suk shong saiñ kaba khraw.
