Shillong, Jylliew 27: Ka jingkyrduh kam ha ka jylla ka la paw shai ha ka jingbun ki Samla ban thep kam ha man ba lait ki kam la ka long ha ki tnad sorkar ne ha ki kompeni ne kino kino ki bor treikam.
Mynta ka sngi, u nongwad RTI ba paw, u Bah Disparsing Rani, u la ïathuh ba na ka bynta ki 119 tylli ki Post kiba lait ha Secretariat, ki la don haduh 1,16,563 ngut kiba aplai.
Haba ïakren bad ki nongthoh khubor ha Shillong Press Club, u Bah Rani, u la ïathuh ba ka bai ekasmin kaba la ïoh na kine kiba aplai kam baroh ka long 57,88,367 tyngka. Katkum ka RTI, kaba la ïoh da u Bah Disparsing, la ïathuh ba ka tarik ba la pynbna ne khot aplikeshon kadei ha ka 9 tarik u Rymphang 2022 bad ka tarik ba khatduh ba pdiang ïa ka aplikeshon ka long 7 tarik u Lber 2022.
Shuh shuh u Bah Rani, u la ïathuh ba katkum ka RTI kaba u la pan, ha Secretariat ym don satia kino kino kiba leit trei ha ka jaka jong kiwei ne ka officiate ba ki ong, hynrei kidon haduh 100 tam kiba la shu thung konkrak ne thung ban trei shipor.
Ha kaba ïadei bad ka jingkiew kyrdan ki nongtrei ha ki tnad treikam bapher bapher jong ka sorkar, u Bah Rani, u la ong ba wat lada ka Departmental Promotion Committee ba la thung da ka sorkar, hynrei kiba bun ki tnad treikam kim tip satia ïa kane, pynban kiba kiew kam ne kiew kyrdan dei tang kito kiba don ka jingïadei bad ki heh ki haiñ. Dei namar kane ka daw ba ki don bun ki ophisar kiba shah knieh kiew kyrdan ha kiwei pat kiba kham hapoh jong ki, ki leit ujor sha ïingbishar ne don kiba shong thait noh khlem pat dei por ne kata kaba ki long ka Voluntary Retirement Scheme.
Ha kajuh ka por une u nongwad jingtip, u la pynpaw ka jingsngewkhia ba ki don katto katne ki tnad treikam jong ka sorkar kiba la jan ngam noh, kum ka tnad Sericulture, ka Textile bad kiwei kiwei.
