Shilong, Jyllliew 27 : Ka Kynhun Myntri jongka sorkar MDA kaba la ïa kynduh mynta ka sngi 27.6.2022 ka la rai ban thung noh da u/ka Chairman -cum- Managing Director (CMD) ba pura jongka Meghalaya Energy Corporation Limited (MeECL) ban peit bad khmih beit tang ïa ki kam ki jam ba ïadei bad kane ka kompani pynmih bording ka sorkar jylla.
Haba karen sha ki lad pathai khubor u Myntri Rangbah u Conrad K Sangma u la ong “ Ha kane ka jingïakynduh jongka Kynhun Myntri la shim rai ruh ban pynthymmai ïa ki rukom treikam jongka MeECL nadong shadong bad ki lai tylli ki tnad treikam jongka ka Meghalaya Power Generation Corporation Ltd (MePDGCL), ka Meghalaya Power Distribution Corporation Ltd (MEPDCL bad ka Meghalaya Power Transmission Corporation Ltd (MePTCL) kin hap hapoh ka jingpeit bad jingkhmih une u/ka CMD ba pura. Une u CMD ba thymmai un long na ki IAS ne kiba kiew kam napdeng ki Engineer jongka MeECL tangba yn jied da ka lynti kaba khuid bad suba”.
U la ïathuh shuh ba u Chairman ka MeECL un long u Myntri ka tnad pynmih bording bad ki Chairman jong kitei ki tnad ka MeECL kin long da ka Chief Secretary, Addl Chief Secretary ne Principal Secretary kiba dei peit ïa ka tnad pynmih bording.
U Myntri Rangbah u la ong “ La shim ïa kane ka rai halor ka nongrim ba ha kine ki 50 snem kiba lal eit noh ïa ka MeECL la shu peit da ki ophisar jongka sorkar jylla kiba peit ruh ïa kiwei kiwei ki tnad treikam jongka sorkar kumta ka eh bha ïa ki ban pynlut por, pynleit jingmut ban peit beit tang ïa ka MeECL ban pynïaid shakhmat ïa ki kam ki jam jongka. Kumta la shim ïa kane ka rai kum kawei na ki lad ban pynthymmai ïaki rukom treikam jongka MeECL bad kitei ki lai tylli ki tnad treikam jongka”.
Ha kaba ïadei bad ki Engineer ba ki lah ban shimti ïa ka kam CMD da kaba jied ïa kiba dei hok ban ïoh bad da ka lynti kaba khuid bad suba, u Myntri Rangbah u la ong ïa kane ruh ym ju ïakren ha ki por ba mynshwa hynrei mynta la sngewthuh ba donkam ïaki Engineer ruh ba kin kiew sha kane ka kam ban peit bad pynïaid ïa ka MeECL.
“ Kumta ïa uno uno na kano kano u/ka Engineer kiba la tbit bha ka rukom treikam bad kiba la ju pynïaid ruh ïa kino kino ki PSU ïa kiba kum kita ka sorkar kan hap ban shim nyngkong eh bad kane kan ïarap bad ai mynsiem wat ïa ki nongtrei jongka MeECL hi ruh.
U la ong ba ka sorkar ka thrang ba kane ka jingwanrah ïa ka jingpynkylla kan wanrah ruh ka jingkylla ka rukom treikam ka MeECL tangba ïa kata ruh phi tip hi ym lah ban pynkylla shimiet shimiet kan hap ban shim por hi ban ïaid suki khnang ban ym bakla.
“ Ngi ngeit skhem ba da kane ka jingpynkylla ïa ka rukom treikam kan wanrah ka jingbha bad jingmyntoi ha ka rukom treikam ka MeECL ha ki por ban sa wan lane nangne shakhmat” pynkut u Myntri Rangbah.
