Shillong, Jylliew 27: Ka Meghalaya Pradesh Congress Committee (MPCC) ryngkat ka Meghalaya Mahila Congress Committee (MMCC) mynta ka sngi, ki la pynlong ka jingïakhih hakhmat ka ophis MPCC ban pyrshah bad dawa pynduh noh ïa ka skhim rung kam shipai Agnipath.
Ka Seng ka ong ba ïa ïeng lang bad ki Samla jong ka ri ban ïada ïa ka hok jong ki ban dawa ban pynduh noh ïa kane ka skhim.
Ka kyrwoh ba la phah da u Sanjay Das, General Secretary ka MPCC, ka ong ba kane ka skhim ba la wanrah da ka sorkar BJP kan long ka jingma ïa ka jingshongshngaiñ jong ka ri. “Ka jingai jinghikai ne ka training ba tang 6 bnai kam pat biang satia na ka bynta ka jingïakhun thma jong ka ri”, la ong u Das.
U la ong ruh ba ka long kaba lyngngoh ba ka sorkar ha kaba kum kane ka por ba ka ri ka don hapdeng ka jingma na ki ri kiba na marjan, ka sorkar ka wanrah pynban da kane ka rukom treikam, kaba pyni ba kane ka sorkar kam patiaw ïa ka kam ïada ri ne ka kwah ban pynngat ha ki shipai khnang ban lait ïalade.
