Ngin ym ailad shuh ba ka Assam kan pyntrei ïa ki kam pynroi ha ka thaiñ Langpih ong ki RS bad Seng Bhalang

Nongstoiñ, Nailar 28: Ka shong suk shong saiñ ka la sdang ban wan phai biang ha ka thaiñ Langpih ha kine ki snem ba la dep, hynrei ka sorkar Assam ha kine ki sngi ka la sdang biang ban thombor bang da kaba wanrah ïa ki kam pynroi, da kaba wan ban thew jaka ban sdang biang ban pynheh ïa ka surok na Kamphaduli haduh Mawsikar.
Ka jingwan thew jaka jong ki briew ka sorkar Assam ka la pynkhih win ïa ki paitbah ka thaiñ, ha kaba ki la ïamih puk ban leit pynsangeh bad ki la beh krad syndon ïa ki ba wan thew jaka.
Ha katei ka jingleit jong ki paitbah nongshnong shnong ban beh krad ïa ki briew jong ka Assam, ka la mih ka jingïania kaba jur haduh ba ka la poi ha u pud ba ki la don ki riew rangbah, kiba la sdang ban ïasyndong kti bad ki briew jong ka Assam. Hynrei na ka jingdon ryngkat jong ki pulit ka Langpih Border Out Post ki briew jong ka sorkar Assam ki la hap ban pyndem tdong bad phet noh.
Kumta halor katei ka jingsdang jong ka sorkar Assam ban wan thew jaka, na ka liang ki rangbah shnong jong ka Mawsikar ba la synran lang da ki nongïalam jong ka FKJGP West Khasi Hills, KSU Rimuliang bad ka Hynñiewtrep Youth Council Rimuliang circle, mynta ka sngi balang ka 28 tarik Nailar ki la wan ban ïakynduh ïa u bah Garod L.S.N.Dykes IAS Deputy Commissioner ka West Khasi Hills, ban kyrpad ïa u ba un shimkhia lem halor ka jingïai wan kyntur pud jong ka sorkar Assam, khlem da burom ïa ka Status quo lane ka jingïateh kular ba katba ym pat pynbeit ïa u pud u sam, dei ban sangeh shuwa ban pyntrei ïa kino kino ki kam pynroi la ka dei na Meghalaya ne na ka Assam.
U bah Trasdingland Nonglang sordar jong ka shnong Mawsikar haba ïakren bad ki lad pathai khubor, u la ong ba ka jingwan ïakynduh ïa u Deputy Commissioner ka long namar ba ka dorbar shnong Mawsikar, naduh ki snem ba la dep ka la dep rai ba kan ym shah shuh ïa ka sorkar Assam ban kan wan ban pyntrei ïa kino kino ki kam pynroi katba ym pat lah ban pynbeit ïa u pud u sam hapdeng ka Meghalaya bad Assam.
U la ong ruh ba na ka por sha ka por ka sorkar Assam ka ju pynkheiñ ïa ki kyndon ba la ïakut bad ka sorkar Meghalaya. Dei halor katei ka nongrim ba ka dorbar shnong Mawsikar ka la shim ïa katei ka rai, ba kan ym shah shuh ba ka Assam kan dang wan mushlia ïa ki jaka ki puta ha ka thaiñ Langpih bad ka sorkar Meghalaya ruh ka dei ban shah jem halor ka jingpynkheiñ jong ka sorkar Assam ïa ka jingiakut. Lada ka sorkar Meghalaya ka shah jem ki paitbah ka thaiñ Langpih kin ym ailad kam pher wat lada kan poi haduh u pud bad ïa kynrup para briew ruh.
U bah Serbilin Lyngdoh president ka FRKJGP Rimuliang circle, u la ong ba baroh ki paitbah nongshong shnong ka thaiñ Langpih, kim kwah satia ba ka sorkar Assam kan wan pynbiej da ki kam pynroi, namar ki sngewthuh shai ba ki dei ki nongshong shnong jong ka Meghalaya bad ki kwah ban sah beit ha poh ka West Khasi Hills.
Kumba ka seng ka la dawa na ka por sha ka por ba ki ar tylli ki sorkar ki dei ban pyndep noh ban pynbeit ïa u pud u sam, kumta mynta ruh ka pynkynmaw biang bad lada ka sorkar kam pyndep noh kloi ban pynbeit ïa u pud, lym kumta ka seng kam banse ban ïaid noh da kiwei pat ki lynti.
Na ka liang ki nongïalam ka KSU bad ka HYC Rimuliang circle pat ki la ong ba na ka bynta ban wanrah ïa ka shong suk shong saiñ jong ki paitbah ha ki shnong kiba hap hapoh ka Langpih sector, kin ïatreilang bad ka FKJGP, ki sordar shnong bad ki paitbah. Ki la ong ba ka sorkar Assam ruh kam dei ban thombor ne sdang biang ban wanrah ïa ka huri hura bad lada jia kano kano ka jingeh ka sorkar Assam ka hap ban kit khlieh hi.