Nongpoh, Nailar 28: Ka skul Mawhati Rural Community Secondary School, kaba dei ka skul kaba la shu pynlong klas ha ka Galery jong kawei ka madan phutbol ha katei ka thaiñ bala shu ai sngewbha da ka shnong bad kumjuh ruh ka sports club, mynta ka kynti ka la ioh ïa ka mang tyngka kumba 8 lakh tyngka lyngba ka Chief Minister Special Development Fund ban sdang ban tei noh ïa ka iing skul haka jaka lajong.
Katei ka jingïarap ba katei ka skul ka la ioh ka dei ruh ka jingtuklar u MLA ka thaiñ u Bah Charles Marngar hadien ba kum ki bor pynïaid skul ki la pynsngew sha u myntri rangbah ka jylla halor ka jingdonkam kyrkieh jong ki ban ioh noh ïa ka iingskul lajong bad kaba paka na ka bynta ka jingbit jingbiang jong ki khynnah pule.
Kane ka skul ka dei kaba la sdang seng naduh u snem 2006 hapoh ka jingpeit jingkhmih jong ka Parish Umsohlait bad dei ha u snem 2016 ka Parish ka lah aiti noh sha ka Shnong ban pynïaid ïa kane ka skul.
U Bah Charles Marngar u la pynlong ruh ka jingjurip ïa katei ka skul, bad lap shisha ba ka jinglong jingman katei ka skul ka la isangsot shisha watla katei ka skul ka la don haduh ka Secondary Level, hynrei kam ïahap dor eiei haba nujor bad kiwei ki skul namar naduh ki kamra klas ki long kiba rit bad kiba khapngiah bad la shu pynlong klas jubor ha gallery jong katei ka madan namar ba ym don lad da kumwei.
Watla katei ka jingïarap ka dei kaba dang rit bad dang donkam shibun ban pynbit pynbiang bad ban sdang ïa ka skul hynrei kum ki bor pynïaid skul ki la pynpaw ka jingsngewnguh ïa ka jingshimkhia u MLA bad kumjuh ruh u Myntri Rangbah u ba la mang kyrpang ïa katei ka skhim.
Haba kren ha kane ka sngi na ka liang u Bah Charles Marngar u la ong ba katei ka skul ka la donkam eh ban ioh noh laka jong ka iingskul building kaba paka bad pynpaw ka jingsngewnguh ïa u Myntri Rangbah u la ba la pynsngew ïa ka jingkyrpad bad ban pynmang skhim ban sdang ban shna ïa ka building watla ka jingïarap ka long kaba dang rit hynrei kum u MLA u la kular ban shimkhia ban kyrpad sha ka sorkar bad ban thaw ïa ki lad ki lynti ban pynmang shuh shuh ki skhim na ka bynta ki jingïarap ba katei ka skul kan ioh ban shna ïa ka building bad ki kamra klas kiba paka.
