Nongpoh, Jylliew 27: Ka ophis u District Sports Officer Ri-Bhoi District mynta ka sngi kala sdang noh ïaka lympung ïalehkai phutbol District Level Inter-School Subroto Mukherjee Cup Football Tournament 2022 ban jied ïaki samla ïalehkai ba kynsai na Ri-Bhoi bala pynlong haki ar tylli ki madan ïalehkai kata ha madan Umdihar bad Umbuda.
Ha katei ka sngi ka jingsdang ïa katei ka lympung ka jinglehkai plie pyrda kala long hapdeng ka Saiden Secondary School pyrshah ïaka Borkhatsari Presbyterian Secondary School haka U-17 jong ki kynthei ha kaba ka Saiden Scondary School kala lah ban pynliem noh ïaka Borkhatsari da 8-0 kol ban mad ïaka jingjop ba nyngkong jong katei ka lympung.
Haka liang ki shynrang jong ka U-14 bala pynlong ha madan Umbuda ka jingïalehkai kala long hapdeng ka Christian Higher Secondary School pyrshah ïaka Ri-Bhoi Presbyterian Higher Secondary School bad ha katei ka jingïaleh ka Christian HSS kala lah ban pynliem noh ïaka Ri-Bhoi Presbyetrian HSS da 4-0 kol.
La wan ruh ban sakhi bad ai mysiem ïaka jingplie pyrda ïa katei ka lympung ha madan Umdihar da u Bah RB Shadap President ka RBDSA, haka jingdonlang u Bah Bobby L Nongbet DSO ka Ri-Bhoi District bad kiwei kiwei ki ophisar naka tnad ïalehkai.
